MH370 tayimtsü bushiba jahaz samaogo ta bilem

Kuala Lumpur, Tsüklai 08 (Agencies) : Samar aliba Malaysia Airlines tayimtsü MH370 bushiba jahaz ka ‘tracking screens’ nungi samadok, anungji jahazji samaogo südi ta nüburtemi bilem. Aji oda süaka, ibaji totzü enokshitsü atema Australia nung oagi anenba dang liasü anungji maneni samar aliba tayimtsü bushia jajatsü, ta tanü Yangtepnü Malaysia sorkari jangjashitsüogo.
“Kecha shisabulutsü mali. Onoki tayimtsü den külemi samar aliba adianutem dang olulu mesüra tiyazü osang mamangtsü mepishir,” ta Transport Minister, Liow Tiong Lai-i AFP osang den jembidang metetdaktsü.
Paisa ashiba agi, tayimtsü bushiba jahazji junga dang lir anungji sentong yanglua aliba ama maneni mapa inyaka aotsü.
MH370 tayimtsü ya 2014 küm Metsüremi ita nung China nunger teimba ser nisung 239 mener Kuala Lumpur nungi Beijing yimti bushia aoba mapang kong samar memeteti lir.
Taoba mapang nung Australia nungeri anir Indian Ocean tezülen ita 28 songtema square mile 46,000 longa bushia liasü saka tayimtsü indang tsüngsü kecha menguteti taoba Aenjeti ita nung anena liasü.
Ajiser taoba ita nungi tenzüka Malaysia sorkari ‘Ocean Infinity’ ta ajaba private firm ka nem asentenshir bushitsü nunglokja lir.
Anogo ter tzüyim nung ‘high-tech underwater drones’ amshia parnoki samar aliba tayimtsüji bushia liasü saka ajungbena osang kecha memetetdaktsüi dang ‘Automatic Identification System’ shibanga ayuba sülen nüburtemi temulung malem bilema liasü.
Totzü enokshitsü atema jahazji Australia nung Fremantle jahaz anendak bushia ao, ta Liow-i jangjashitsüogo.