Minister temi SC judge temi jembiba ama jembitsüla: Yashwant

New Delhi, Aenjeti (January) 13 (Agencies): BJP-i aniba sorkar maneni aija tanü BJP lenir, Yashwant Sinha-i party nung külem tenzükertem aser Cabinet minister tem dang, Supreme Court nung judge pezüi jembiba ama tetsübu shisatsü indoker democracy atema jembitsüla, ta ashi.
Taoba mapang Union minister, Sinha-i Supreme Court judge pezüi jembiba otem nung ajemdaker, tang linük tensa ya 1975-77 mapang Emergency ama lir, ta shia parliamentary senden mapang tatsütsü dang agiba atema tebilemtsü kaa jembi.
Tanü osangbenertem den jembidang pai, Parliament nung atsüanem lir, Supreme Court inyakyim meshidaki lir, yamaji süra democracy amokmeren tia nung lir,” ta ashi.
Sinha-i, “Supreme Court nung senior judge pezü democracy amokmeren tia nung lir, ta shira asenoki ibaji süoki ia agitsüla,” ta ashi.
“Democracy atema bilemtsür senso ajaki ola adoka jembitsüla. Ni party (BJP) lenirtem aser senior cabinet minister tem dang ola adoka jembitsü atema ashitsü. Parnoki tetsübu indoker ola adoka jembitsü atema mepishitsü,” ta pai ashi.
Ajisüaka Sinha-i, Judiciary nung tebilemtsü onükji Supreme Court-i dang bentettsüla, ta ashi.
BJP lenirisa, “Supreme Court nung Chief Justice of India ama, sorkar nunga temabaji Ato kilonser lir, aser par cabinet züngsemtemia ola adoka jembitsüla,” ta ashi.
BJP lenir süaka Sinha-i mapang shia Modi-i aniba sorkar anema ola adoka jembir. Pai demonetisation, GST aser Kashmir onüktem nunga sorkar anema jembia aruogo.
Taoba Union Minister-isa, “Kü nija sasep nunga, sorkar nung cabinet züngsemtem dak tetsübu aliba (Modi anema ola madoktetba) ni meteta lir, aser ibajia asen democracy atema lendong,” ta ashi.
BJP-i aniba NDA mezüng sorkar nung Sinha ya cabinet minister ka liasü; iba mapang nungji pai finance aser foreign affairs portfolios bena liasü.
Paisa, judiciary nung timtem aliba indang SC judge pezüi nüburtem dang sangdongogo, anungji senso tajung ajaki iba atema ola adoktsüla, ta ashi.
Judge pezüi democracy lendong nung aliba indang jembiogo, anungji yimtenren party tem aser Parliament-ia ola adoka jembitsüla, ta paisa metetdaktsü.
Asükwa mongpu Parliament senden agiba dak sendakba nung Sinha-i, iba ama senden mapang tatsüka dang agiba ya pai kodanga majangshidang, aser iba ya-a democracy atema amokmeren ka lir, ta ashi.