Mizoram nung Myanmar telungpur 3 anepalur

Aizawl, November 16 (Agencies): Mizoram nung Hombar nungi Arakan Army (AA) züngsem asem mozü kidang anepaludar ta police ketdangsertemi ashi.
Myanmar kübok Arakan (Rakhine) state den arrtsüa aliba Lawngtlai district nung police-i iba osang metetdaktsü.
Par asemji Arakan state nung Myanmar Army den raradang yiruba asütsü akok aser par asemji arrtsü adena Mizoram-i aru, ta police-isa ashi.
Par asemji Thuan-Thuan (31), Cho-cho (27) aser Aung-Aung (21) nungertem lir, ta parnokisa shisem.
Par asemprongla Lawngtlai district mozü kidang anepalu aser idak nungjagi Thuan-Thuan bo Aizawl-i anir ogo.
Tesüiba ita ishika tsüngda Arakan nung nisung 400 dak tema jenogo aser iba ya Arakan Army aser Myanmar Army tsüngda rara ajanga lir, ta home minister R Lalzirliana-i ashi.
Arakan nungi aruba refugee aika Lawngtlai district kübok Laitlang, Hmawngbuchhuah aser Zochawchhuah yimtsüngtem nung jenoka lir. Parnok nem local nisungtem aser district administration ajanga chiyungtsü aser tejenokdak agütsür, ta Lalzirliana-isa shisem.
Ajisüaka, tang tashi nung Rohingya Muslim refugee ka danga Mizoram telungi aita mali, ta home minister-isa metetdaktsü.
Arakan nunger parnok 400 tashi Mizoram-i arua jenokba nung par asem Myanmar Army den raradang yiru, ta Lalzirliana-isa ashi.
“Lawngtlai Police Station nung Foreigners Act kübok par asem anema ken o benokogo, kechiyong parnoki temelaba melii aser kulikaket tejangja mebeni India telungi ait” ta paisa shisem.