Mizoram nungi tangazüktsü ka

Tang linük aika nung sorkar atema tebilemtsü tulutibaji mapa manguba tebilemtsü ya asütsü. Yamaji India nunga mapa manguba tebilemtsü khuret agi nendar. Nagaland nunga zünger mapa mangur register süa aliba lanur 72,000 dak tema lir, aser register masürtembo iba dang nungjagi teimba asütsü. Iba tebilemtsü ajanga joko degree aika ngua alirtemia sorkar mapa tilateria bushir aser lanurtem aika teimla samaba dang masü saka tsüraburtem atemaka khuret tulu ka kümogo. Sorkar mapabo telatet ka dang lir, ajisüaka nütsüng arenba ajanga kümshia zünger mapa bushirtembo teimba-teimba akümer. Iba tebilemtsü koktettsü atema Centre aser state sorkartemi mapatong balala benoka lanurtem mapa nung anioktsütsü meranger, ajisüaka kümshia mapa mangur teimba-teimba akümer. Taoba General election mapang nüboyimba sentong ka nung Ato kilonser, Narendra Modi-i, BJP nem yimsüsütsü maongka agütsüra pai India nung mapa crore ka agütsütsü ta nangzüka liasü, iba sülen parnoki meranga inyakaka tesüiba küm asem nung pai aniba sorkari mapa tasen lakh 10 shi dang adokdaktsütet. Mapa manguba tebilemtsü adokba tongtibang kuli rongnung- nütsüng tali arenba, rongsenkettsüng mezülongi ainba, aluyimba li agi meperiba aser industry kanga merenlokba kulitem ajanga lir. Anungji sorkari sentong tapu meyina atongaka mapa manguba tebilemtsü ya tuluba-tuluba dang akümtsü südi. Naga nunger lanurtem shilem 60 dak temai state adener tangalen mapa inyaktsü jangraba osang asenoki osangkakettem nung nguogo, aser ibaji ajanga asen lanurtemi mapa inyaktsü jangraba shisatsü sayur. Yamaji Naga nunger lanurtem nem mapa agütsütsü nükjidong nung state sorkari ayongzüka November 17-18 anogotem nung Agri Expo, 4th mile, Dimapur nung anogo ananü Nagaland career workshop & job mela ayongzüka lir. Iba sentong ya sorkar mapa agütsütsü atema masü saka company balalai tetemsü lanurtem shimteta state adener linük tesem balala nung mapa inyaktsü atema maongka agütsütsü asoshi lir. Oda pei lima nungsa mapa inyaka aliba tajungba, ajisüaka pei lima nung kecha meinyaki aliba dang nungibo timtem tera liaka tangalen mapa inyaka alibajisa tajungba asütsü. Ano külen sorkar mapa mebushiaka asen state nung aseni inyakettsüsa teka mapabo jenti lir.  State balala nungi tsümartem aika pei kibong yutsür yangi Nagaland nung arua mapa tilateri inyaka kibong mesüa alir jenti lir; parnoki inyakba mapa teimba ka asenokia inyaktettsü. Northeast nung aliba state tem nung, kisüjensü mapa inyaker tsümar kar dak alaka local nisungtemi dang shishilembaba aser tilateri mapa ajak arakmoka inyakba state jibo Mizoram dang asütsü. Ano külen süoshi dokan, chiyungtsü aser electronics dokan lapoka alirtemji timbaka Mizo tsürtem lir. Mizoram nung local nisungtemi shishilembaba aser mapa balala inyakba ajanga tsümartem aayangdak makai akümer, ibayongji parnok arua malir; iba tangatetba nung Mizo nunger lenirtemi lanurtem nem training agütsüba den lenmang sayua mapa inyaktsü ajungshir. Mizo nungeri inyakba ama asen Naga nungeri joko sorkar mapa dang meimlai mesüra menemnemi shishilembaba aser teka mapa balala inyaktsü anjungmeshiogo. Iba denji külemi sorkari anir Arogo aser lokti tentettemia lanurtem nem teka mapa balala indang training agüja lenmang sayura lanurtem aika langka nungbosa tatongokdak alitsü. Asen lima nung sen aika tsümartem keti aor aser item senji state adener oadoker, anungji kodang lanurtemi teka mapa balala inyakdir ibaji ajanga asen rongsenkettsüng jenjanga tajungba akümtsü.