Mkg nung lanurtem atema tanelar benjong akar

Mokokchung Town Youth Spiritual Festival sentong nung Youth Alive Ministry ajanga tetushi aser tekulem agiba mapang tangokba noksa nung angur.

Mokokchung, Aenjeti (January) (TYO): ‘Mokokchung Town Youth Spiritual Festival’ ta sür lanurtem atema tanelar benjong tulu ka “ranglok (focus)” omen dak ajemdaker Bodhbar aonung nungi yangi Imkongmeren Sports Complex Mokokchung nung tenzükogo.
Iba sentong ya Mokokchung Town nung aliba Ministry pongu longjemer ayongzük. Taonung iba sentong nung lanur parnok meyi ana shi adenshia liasü.
Taonung Tsüngrem Osang abener Missionary, Among Lemtur-i “Ranglok” omen nung ajemdaker jembidang, nisung ka taküm nung nükjidong ka ataloktsü asoshi ranglokba ya kanga tongtibang lir, ta ashi.
Taküm nung asen ranglok raksatsütsüsa/benjatsütsüsa alima nung tenokdangba tapu aika ajurutsü akok, aji saka, kodang asenoki Yisu dak ranglokdir, tamakok ajurutsü aliba nungia takok angutsü, ta paisa Laishiba O tapet bener arua Tsüngrem dak rangloktsü asoshi tayongzükba agütsü.
Ranglokba ajanga asen taküm nung nükjidong kanga jangja meteter, ranglokba ajanga asenok tasü ita kümdaktsür, anungji, Tsüngrem dak ranglokba nungi mepilatsü asoshi paisa ayongzüka liasü. Kodang asenoki Pa dak ranglokdir ne taküm nung sayatenya aser tesüngmangtsü mapatem inyak tenzüktsü, ta paisa ashi.
Taonung Mulung Imsong-i ken ajanga Tsüngrem osang aben. Jan 11 aonunga Among Lemtur-isa Tsüngrem osang abentsü. Anungji, Mokokchung nung alirtem dang masü saka tejangrar ajak arua shilem agiba den amangabapur ajaki iba sentong asoshi maneni sarasademdaktsünür, ta tayongertemisa mepishia metetdaktsü.
Iba tanelar benjong ya Jan 14 tashi agiyonga aotsü. Jan 12 nü Temsüwati-i jembitsü aser Jan 13 & 14 nüji Lima Imsong-i jembitsü sentong renema lir. Sentep ajak aonung 5:00 ako nungi dang tenzüktsü.