Mkg nung Vikings Club ta sür cricket club tasen ka tentetogo

Mokokchung, Sept 22 (TYO): Mokokchung Deputy Commissioner Sushil Kumar Patel IAS-i Hokulbarnü yangi Eastern Talkies Mokokchung nung Vikings Club Mokokchung, ta sür cricket club tasen ka meraketa tenzüktsüogo.
Tanü Sushil-i iba club tenzükja mapang tatsüka agia jembidang, India nung British nunger yimsüsüba mapang cricket ya chuba aser tulurtemi dang teimba asaya. Aji süaka, 1983 sülen ajungbena India nung cricket tiaji balaka melenshia tanü joko India nung cricket ya saisapong dang nungi alia moraloka aor, ta ashi.
Cricket ya saisapong ka dangbo masü ta asüba kuliji yangi ngujem (scope) tulu lir, anungji, meranga asayatsüla aser sempet aketer lanurtem anitena ajungshitsüla, ta pai-sa ajungshia liasü. Cricket ya lanuwa nungi kanga junga angazüka atutsüla, ta pai-sa shisem.
Mokokchung ya lenmang aisü nung mezüng tenzükba district ka asünung, tarutsü nung iba club nungi cricket asayar tajung adokdaktsütsü nükla yudaktsünür, ta pai-sa tayongzükba ka agütsü.
Iba sentong nung Mokokchung District Cricket Association, Mokokchung District T20 Cricket Federation nungi ketdangsürtem arua shilem agia aden. Sentong nung Vikings Club Mokokchung tir Temsü Aier-ia club tentetba nükjidong lemsatep.
Iba club ya Mokokchung nung cricket meimer lanur ishika lungjemer tongtibangsa cricket asaya nüngtugu kümdaktsüba den liso lanurtem anitena ajungshitsü nükjidong yur tentetba lir.