Mkg town ya meimchir aliba jila ka mesüka kümdaktsütsü: Metsübo

Mkg, Tsüklai 19 (TYO): 27 Mokokchung Town Assembly Constituency nungi Nationalist Democratic Progressive Party (NDPP) candidate, Metsübo Jamir election-i aitsü sangdongba sentong ka Tentonü par kidang Sangtemla ward Mokokchung nung agiogo.
Pai tanü iba sentong nung jembidang, pa election nung noktakbaji shinga anema masü saka nübur tenzüktsü aser Aor telungjem asoshi inyaktsü nükjidong nung noktaker, ta ashi.
Mokokchung town A/C nung ya voter meyi tenet shi dang lir, anungji, inyakdi süra yangi terenlok mapa inyaktsübaji kanga tasakbo masütsü, ta paisa ashi. Aji oda, kiyong shia nung nüngdakbatem reprangshima inyaktsü, ta paisa shisem.
Pa election-i aiba mangdang kar lemsatepdang, pa adokra Mokokchung Town nung lenmang, tzü, light, kima yimdong aser kiojen tang aliba tia dang nungi temaba jenjangi ajungkettsütsü asoshi inyaktsü, ta ashi.
Mozü aser shiranger anepaluba, kaket shisaluyimba wadang ajunga nung terenlok bener arutsüba den lanurtem asoshi mapa, rongsen-luyimba, kenten-menü, saisapong amala renlokba wadang balala nung temulung agütsütsü tejangraba lir, ta ashi.
Iba den ano tantsür-tambur, tetsür, tajemzükba jenjang nung alirtem aser tsüngtsük-longtsükertem temaba jenjangi ajungketa teyari bener arutsütsü aser Mokokchung jila ya lima-penzür puadaktsüba yimti (tourist attraction centre) ka kümdaktsütsü, ta paisa teinyaktsü kar lemsatep.
Paisa tenangzükba o kar shisemdang, LADF (Fund) ochi shia constituency nung terenlok mapa asoshi amshitsü, election nung takok nguaka-munguaka Mokokchung Town constituency kübok aliba ward ajak nung tzübo (bore well) kaka tutsütsü, aser lanurtem atema coaching center-tem lapoka jenjang dalang agi angazükdaktsütsü, ta paisa ashi.
Pa adokra Mokokchung town ya meimchir aliba jila ka mesüka kümdaktsütsü pa mangdang lir, anungji, tarutsü atema bilema pa nem khen yimsüsütsü maongka agütsütsü asoshi 27 Mokokchung Town A/C NDPP candidate-isa mepishia metetdaktsü.
Metsubo Jamir ya Longsa nunger aser pa ya taoba RD Director lir.