MLA, Mhonlumo Kikon tepsettsü merangba aitsür: BJP

Dimapur, Tsüklai 18 (TYO): BJP MLA aser 40 A/C Bhandari nungi tokteptsü alisang candidate, Mhonlumo Kikon election nüboyima senzür meyipa aruba mapang nung Tsüklai 17, 2018 nikongdang Wokha district kübok Yimpang yim anasa nisung kari pa taküm agitsü merangbaji Bharatiya Janata Party-i sashia aitsür, ta tanü Nagaland Media Cell BJP Nagaland sangdong ajanga metetdaktsü.
“BJP nung kanga tongtibang lenir ka aser akhümket lenir ka amakbaji onoki khenyongi magizükteter. Bhandari Assembly constituency nüburtem atema nokdaker ka, nüburtem temeden atema jembir ka, kanga tenendak lenir ka aser o nung kanga tsüngro tasong lenir ka ola makai kümdaktsütsü nükjidong nung yimtenren tsütsü nungi amakbaji nüngdak makaba,” ta sangdong nungsa shia lir.
District ketdangsertemi Mhonlumo taküm kümzüka alitsü atema tang rongdak süa inyaktsüla, aser pa tepsettsü merangertemji pua ken o akatsüla, ta parnokisa takhangba agutsü.
“Yimtenren nung tetoktepertem tetuyuba nung mejangjaba nisungtemi asalentong tamajung yanglur amakbaji, state tesem ajaklen ozü party nung inyakertem tsübudaktsütsü inyakba mapatem rongnung ka lir,” ta sangdong nung shia lir.
“Onoki State Election Officials dang nisung tepsettsü merangbaji bushisüngdangtsü, iba den külemi state nung Election Code of Conduct anema inyakba mapatem bushisüngdangtsü akhanger,” ta BJP Nagaland-isa metetdaktsü.
“BJP densema yimtenren party ajaki NBCC-i ayongzükba ‘Clean Elections’ pusemba mapang ka nung tanga party temi tangar dang nungibo Khristan tamang nung parnok tajungba, ta jembiaka kechiba parnoki sübokrem amshir, rara adokdaktsür, amokmerener aser ozü party züngsemtem anema inyaker,” ta sangdong nung shia lir.
“State tesem balala nung ozü party nung inyakertem anema kanga bulua inyakba ajanga tanga party temi yimtenren tsütsü rara adokdaktsüba sayur, iba ya mazüoktettsüsa tamajungba makümdang anentsütsüla. Onoki Bhandari Assembly Constituency nüburtem dang election inyakyim nung tetsükdaktsü malitsü atema tesünep alitsü mepishir,” ta BJP Nagaland Media Cell-isa metetdaktsü.