Moapu nung scü kozüba ajanga mashisa alir timtemer

Bhubaneswar July 09 (Agencies): Merükmeju maliba aser scü kozüba tesem peria maliba ajanga mashi nung janaba ajanga mashisa alir dak timtem aika ajurur aser mapang matongdang tanur asor, ta bushisüngdang ka ajanga ngutetogo.
Iba tongutetba ya ‘PLOS Medicine’ kaket nung adoktsüogo. Iba bushisüngdang ya Odisha nung aliba yimtsüng ana nung mashisa alirtem dak agia liasü.
Asian Institute of Public Health, Bhubaneswar Bijaya K. Padhi aser pa den külem inyakertemi tanur benlokli alir tetsür 670 iba bushisüngdang atema züluoka liasü. Parnok tenüng züludang parnok scü kong kozür aser koma merük mejur item osanga tejangja bendener parnok tanur maso tashi kanga asadanga liasü.
Scü kozüba ki tajung amshir dang nungibo moapu nung scü kozürtemi timba ka mapang matongdang tanür asor aser timtema timba ajurur, ta iba bushisüngdang ajanga nguteta liasü.
Bushisüngdanger temi takar, sensaker, kibong tajung aser kibong tamajung tsütsü nungi iba bushisüngdang magi saka merük-meju aser scü kozüba yimya nung ajemdaker agia liasü.
“Tanur abendang, rongsen akaba mesüra makabaji masü saka merük-mejua alibaji ang ajak dang nungi tongtibangba,” ta University of Nebraska, US nungi iba bushisüngdang nung mongin Pinaki Panigrahi-i ashi.