Modi-Care tenzüktsüla

Centre nung NDA sorkari 2018 Budget sayaba nung mapatong tongtiba ta züngshibaji ‘Modi-Care’ lir aser iba mapatong ya küm ana tejakdang Prime Minister Narendra Modi-i ministry balala nungi sorkar tongti ketdangser 11 den mezüng lemsatepa tenzük. 2016 küm amenba senden nung Modi-i ketdangsertem dang PowerPoint presentation ka health sector nung temelenshi bener arutsü aser India nung sensakertem asoshi health protection scheme ka tenzüktsü tebilemba metetdaktsü. Iba sülen Centre sorkar department balala nungi joint secretary 30 shimteta parnoki 2016 küm tetenzüklen senden 16 ben mena tebilembatem lemsatepa sentong atong. Iba mapang parnoki health nung mongin nisungtem dang nungia tebilembatem meshia liasü. Iba scheme kübok India nung senso ajak aittsü aser yamaji süra Socio-Economic Caste Census (SECC) nung bushiteta alima ama tangar memenepba kibong crore 10 nembo health protection angati agütsütsü. Iba mapa ya private aser public health service provider ajanga ketdang asütsü aser state-level health society aser trust temi indangindanga inyaktsü. Iba atema health providers aser state health society nung tenüng züluoka alirtem biometric kuli tendangtsü aser sen crore 10,000 shi endokba nung Centre aser State telemsaji 60:40 tangatetba nung asütsü. Tongti ketdangsertemi prime minister dangi abenba report nung kibong crore 10 indang SECC data yimjak nung metetdaktsütsü aser primary health centre unit ajanga shirangertemi cashless card ka bener public mesüra private sector hospital ka nung anepalutsü indang shia lir. Linük nung AYUSH doctor lakh 7 shi lir aser parnok nem ita trok training agütsüba ajanga primary health centre tem nung AYUSH doctor temi shilem tulu agitettsü ta ketdangsertemisa ashi. Yaküm Luchiii ita Parliament indang Winter Session mapang Lok Sabha nung National Medical Commission Bill of 2017 benok aser iba nung item tongti ketdangsertem aser health nung mongin nisungtemi ashiba onüktem ajak enoksema lir. Iba bill nung Medical Council of India melena tanga telok ka tentettsü aser Ayurveda o Homeopathy doctor temi course ka agiba sülen allopathy mapa inyaktsü onük tem-a benoka lir. Tsüklai 1 nü Finance Minister Arun Jaitley-i “National Health Protection Scheme ajanga linük nung sensaker kibong crore 10 dak tema yaritsü aser kibong shia nem kümshia secondary & tertiary care hospitalization atema sen lakh 5 tashi teyari agütsütettsü” ta ashi. Iba ya alima nung sorkari teyari agüja inyakba healthcare programme tulutiba asütsü aser iba ya mapa küma inyaktsü atema sorkari sen peria agütsütsü ta Jaitley-isa metetdakja liasü. Sensaker aika aliba India linük ka ama nung iba ama health scheme tajungtem nüngdaker, kechiyong sensakertem shirangdang teyaritsü tim meyaritetba ajanga nisung aika taküm samar aser ano shirangdang sen maliba ajanga mozü-a dena alia mechitetba kibongtem lir.  Sorkari jembiba amaji mapa küma iba scheme tenzüktet nungbo sensosangertemi kanga tajangzük angutsü, ajisüaka sorkari parnok tenüng tajung agitsü atema dang aser election nung nübortem atsür arutsü atema dang iba scheme indang jembir süra, künü anogo nübortemi iba dalangji meyiptsüküm. Talisa, Modi-Care ta ajaba scheme ya 2019 Lok Sabha elections nung nübortem atsür arutsü nükjdong nung Modi’er sorkari jembirba dang lir ta nisung kari ashir aser iba jagi senso aikati iba scheme nung temulung melemteti lir. Anungji, Centre sorkari tangatetba tajung nung iba scheme tenzüktsü asoshi bilemer süra, taküm kümsa iba scheme ya mapa küma tenzüktsüla.