Modi’er sorkar o aser mapa na meputep: Sonia

New Delhi, Sept. 08 (Agencies): Mongolbar nü Congress Tir, Sonia Gandhi-i, Modi’er sorkari “parnok jembiba aser mapa na putepdaktsütsü nung kanga mejungi tamakok nguogo,” ta ashi.

Congress tongti Sonia-i, tejashitsü kaji, “ato kilonseri election mapang nangzükbatemji mepong dang liasü,” ta ashi.

Delhi nung Congress Working Committee (CWC) senden nung jembiba mapang Sonia Gandhi-i, “Ato kilonserji tamakok angubatem jenjang kati aluogo aser ibaji ajanga pa tangatetba shitakbaji angatettsü tasak,” ta ashi.

“Jawarharlal Nehru dak tenük yoker puti otsü zülushitsü benoker,” ta Sonia-i aitsü.

“Rongsenkettsüng nemzüka aludagi aser osettsüset jenjang maneni atur. Parnok tenangzükbatem- mapa adokdaktsütsü mesüra Make in India yimyim, parnok indang koma ishiba jembir, aji oda tajungba,” ta Sonia-i ashi.

Congress Tir-isa, BJP-i osangbenertem amokmerener, ta aitsü. “Temetetdaktsüba aser tanga talenba mera balala ajanga osangbenertem amokmerener,” ta lai ashi.

India-Pakistan dak sentakba nung lai, “Asen kiyong (Pakistan) nung security tensa tamajungba kümogo. Pakistan den inyakyim tajung ka inyaktsü melena, iba sorkar yagi parnoki kechi inyaktsüla’ar iba telemtetbaji magiteter,” ta ashi.

Laisa taoba hopta BJP minister tem BJP-RSS asemnü senden nung adenba atema aitsüogo. “Mapang talangka nungi inyaka aruba ka taoba hopta linük nem kuli tejangja agütsüogo. Modi’er sorkarji Rashtriya Swayamsevak Sangh (RSS)-i teteyuba agütsür aser azüoker,” ta ashi.

CWC ya Congress nung telemtetba agiba tentet tulutiba lir, aser tang parnok senden nung linük yimtenren tensa indang jembidar.

Sonia Gandhi küm 17 tashi Congress Tir inyaka arudagi aser taküm December nung la mapangtong tembangtsü, aser la melen lenir shimtsü atema sangküm organizational election agitsü sentong lir.

Sonia Gandhi-i 1998 küm Congress tongti mapa agizüka liasü aser party nung mapang talangtiba Tir inyakerji la lir.