Mokokchung nung Inter Sec. & Hr. Sec. School Football Tournament asayar

Mokokchung, Sept 21 (TYO): Deputy District Education Officer Mokokchung, Wt. Sentinenlai yangi Imkongmeren Sports Complex Mokokchung nung Inter Secondary & Higher Secondary School Football Tournament meraketa tenzüktsüogo.
Iba asayamung ya Mokokchung District Football Association (MDFA) tenzüker küm 25 ajungba nüngtem nung ayongzüka akar. Taküm iba asayamung nung Mokokchung district kübok school 11-i shilem agidar.
Mezüng jenjang angur nem tanga senpet den sen 20,000/- aser tanabuba nem 10,000/- senpettsütsü, ta tayongertemi metetdaktsü. Iba asayamung atema Rongpang Reju Arkong-i trophy tajung ka tenla agütsü aser senpet sen 1st & 2nd-ji Nehru Yuva Kendra (NYK) Mokokchung-i renemtsür.
Tanü tongti tesemdanger Wt. Sentinenlai iba asayamung lapokja jembidang, küm 3/4 shi school education department-i Inter-school tournament mayongzükteti aruba mapang ka nung, MDFA-i shisateta aser achayanga iba asayamung ayongba asoshi pelaba mezüngbuba lemsatep.
Asen taküm nung saisapongba ya tongtibang telen ka lir, iba yagi asen mulungsentsü aser temang yakyaka yutsür aser tashi itdaktsür. Ibaji dang masü iba yagi telok külemi asayatsü nela (team spirit) aser lenisüba sempet rendaktsür, ta lai ashi.
‘Meimchir taküm ya saisapong ka mesüka lir, khenkhen akoker aser khenkhen tamakok ajurur, aji oda, saisapong asayaba ajanga takok aser tamakok anaji asenoki agizüktsü angazükdaktsür’, ta laisa shisem.
‘Kaketshir taküm kaji class nung marks/grade tajung angutsü dangbo masü, ajia tongtibangako, saka kaketshir kati taküm nung liyonga aotsü atema tasü tait (confident) aser nübusen (personlity) renloktsübaji kanga tongtibang lir’, ta laisa ashi. ‘Saisapongba medeni education-ji teperi masü’, ta laisa shisem.
Saisapong ajanga tazüokba, taremzük, mapang shitak amshiba aser nisung ka tasü ita kümdaktsür, aser nüburtem tsüngda telungjem, teputep, sakusaku aliba shisatsü apuoktsür, aser itemji ajanga nisung ka taküm liyonga aodang timtim balala ajuruba nung yarir, ta lai ashi.
Tanü joko saisapong luyim ya tongtibang ka kümogo aser kaketshir aikati saisapong ya pei taküm nung career ama shim tenzükogo. Anungji, nai inyakba aser merangba nung takok angutsü asoshi chichiba saisaponger ka ama yimya tajung nung asayatsü asoshi laisa kaketshirtem ayongzüka liasü.
Shilem agir school-temji; Canaan Christian Hr. Sec. School, Edith Douglas, Senayangba GHSS, GHS Chuchuyimpang, Children School, Queen Mary HSS, Mayangnokcha GHSS, Town Higher SS, Nagaland Christian Residential HSS, Model HSS aser GHS Sumi nungertem lir. Iba asayamung ya Sept 21 nungi 23 tashi asayatsü.