Mon nung ‘Children Protection’ awareness sentong agi

Dimapur, September 21 (TYO): Village Child Protection Level Committee & Ward Level Child Protection Committee atema Child Protection dak sendakba nung Awareness programme ka Mon, DRDA Hall nung September 20, 2017 nü kaogo. Iba sentong ya Mon Child Welfare Committee, Mon ADP aser World Vision India den sentepa District Child Protection Unit-i ayongzüka kaogo; Iba sentong nung o jembidang SDO Civil Mon, Kumar Ramnikant, IAS-i ashiba agi, tanurtem ya asen lokti aser linük asoshi tarutsü teimla lir, aser parnok kümzüka parnok tarutsü yanglutsütsüji tsürabur ajak khuret lir, anungji tsürabur aser lokti ajak nem tanur kümzüka ayutsüba nung tekümdangtsü aser tangatetba agütsütsü nüngdaker.
DCPO Mon, Samuel Kapu-ia VLCPC & WLCPC shilem aser tienyaktsü dak ajemdaker jembi aser pai parnok dang tanurtem tarutsü asoshi aser tanur mezüngmeshia amshiba, koba Mon dena district aika nung anogoshia otsü lir, item anema longjemer inyaktsü asoshi ajungshi.
Pai item ken o tem tsürabur tem tsüngda dang bendanger meyui temaba jenjang nung aliba committee dangi abentsü asoshi ajungshi, kechiyong iba ajanga tanur ka indang tarutsü dak kongshir. Paisa ashiba agi, ken o ka angatetteper dang toktsüba ajanga nisungba indang tebilembaji mejangjar aser ochi obendang dena magütsür.
Maneni paisa tsüraburtem dang tanurtem ki balala nung teyariteper amai kwi yoka lir iba data aser address agütsütsü asoshi mepishi, yamaji asünungang tsüraburtem aser jenjang balala nung Child Protection Committee temi item tanurtem kümzüka yutettsü.
Advocate, Mannon Konyak-ia, district nung keno balala dak ajemdaker jembia liasü. Lai, kibong kera akümba, family planning junga maliba amala ajanga timtem adokba tuteta ashi. Laisa ashiba agi, nu menden ka kümzüka ayutsübaji tsürabur ka khuret lir.

You must be logged in to post a comment Login