Mon nung ‘Production Technology on Lemon’ training agiogo

Dimapur, October 14 (TYO): October 13, 2017 nü District Horticulture Office (DHO), Mon nung RKVY project kübok Production Technology on Lemon training agiogo.
Iba sentong lenir, District Horticulture Officer, Y. Bongti Konyak-i tajangzük angurtem pelaa agizükba den külemi, ‘nenok ya khuret bena inyakertem lir, ta tamang kaa iba training atema shimogo,” ta metetdaktsü.
Paisa training agirtem dang, iba training nung angazükbatemji peipei yimtsüng nung külem aluyimertem danga sayutsüla, ta metetdaktsü.
Assistant Horticulture Officer, Mon, Hamkai Konyak-ia pai ajangshibatem lemsatepdang tesasaba olen ka nung, ‘subsidy agitsü atema dang nisung aikati metsühjang agizüker aser project balala timi meinyaker’ ta ashi.
Paisa iba training nung adenertem dang kanga nendaka angazüktsü aser sorkari agütsüba project balala junga inyakba ajanga tajangzük angurtem aser aluyimertemi senotsü aika ajangzüktettsü ayongzük.
Staff agi anüngba dak sendakba nung pai tajangzük angurtem dang parnoki angazükbatem benshiba ajanga sorkar den amaliteptsü aser item projects/plantations junga inyaktsü ayongzük.
Training agirtem dang tetsüngda shidak nung süngdong atemtsü, alu renemba, mesen aser tashidaktem, alu aruhba sülen anepaluyim aser crop canopy management ama tesayuba aika agüja liasü.
Iba training nung shisalen sayurtemji HEA, Mon, Shikmeth Konyak aser HEA, Mon, Bonchung na liasü.