Mumbai tzüyimkümlen Pawan Hans helicopter ka tsükok; tasümang 4 nguogo

Mumbai, Aenjeti (January) 13 (Agencies): Honibarnü Mumbai yimti tzüyimkümlen Pawan Hans helicopter ka tsükogo, aser tang tashi nung tasümang pezü nguogo, ta Coast Guard ketdangser kati metetdaktsü.
Iba helicopter nungji ONGC züngsem pezü den pilot ana mener Mumbai High nung aliba oil rig-i aoba mapang nung iba lendong atalokogo.
Defence otongdar kati ashiba agi, iba tesem nungjagi oset kar nguogo, ajisüaka ibaji helicopter indang shilem asü masüar mejangja.
Dornier aircraft ka aser rong ka amshia iba helicopter aser yangji mena alirtem bushia liasü.
Helicopter (VT PWA) nungji Pawan Hans pilot ana aser ONGC nung inyaker pongu tanep 10:14 ako nung Juhu airport nungi apusoa liasü. Iba helicopter nungji ghonda 3 ser minute 10 atsüktsüsa totzü liasü. Iba helicopter den tatemsabuba osang agiteptetba mapangji 10:30 ako liasü, ta air traffic control osang ajanga metetdaktsü.
“Pilot tem jagi inyakyim nung aliba ama, radio contact ji Juhu air traffic control nung aliba 10:25 ako nungbo oil rig nung air aliba traffic control agi melener liasü,” ta kasa osang ka ajanga ashi.
“Anepdang 10:30 ako nungi helicopter denji osang magiteptet, iba mapang nungji iba helicopter ji Mumbai tzüyimküm nungi kilometer 50 shi pilar liasü,” ta kasa osang ajanga ashi.
Helicopter ji anüngdang 11:00 ako nung anentsü sentong liasü. Directorate General of Civil Aviation (DGCA) ketdangser kati, tayimtsü tsükokba bushisüngdangba telok, Aircraft Accident Investigation Bureau (AAIB)-i helicopter tsükokba kuliji bushisüngdangtsü, ta metetdaktsüogo.