Myanmar-i Election anogo latetogo

Yangon, July 08 (Agencies): Myanmar-i par National Election sentong taküm November ita 8 nü agitsü asoshi anogo latetba osang ka Myanmar Union Election Commission nung Director, U Thaung Hlaing-i tanü Bodbar nü metetdaktsüogo.

Myanmar opposition lenila, Aung San Suu Kyi-i aniba National League for Democracy (NLD) yimtenren teloki tan agitsü renemba election nung takok tulu angutsü ta ajaki teimla tulu yua lir.

Ajisüaka, mitkartemi Myanmar indang yimsütsü tashi benoka alidang latetba linük temzüng nung tetsükdakba ocet kar enoksema aliba den külemi, kasaji melenshitsü asoshi benokba onük magizüktsü telemtetba ka Myanmar parliament-i taoba June ita agiba yong Suu Kyi-ibo tan election nung Tir menden asoshi candidate ka ama metokteptettsüsa jenjang ajurua lir.

Tang lateta aliba linük temzüng nung bendanger ka den kibong akümer mesüra pei chirnurtemi bendang senso agia alir ka nem Tir election nung candidate ka ama shilem agitsü memelatsü ocet enoksema lir.

Aji oda, Suu Kyi-i Britain nunger ka den kibong akümba den külemi, lar jabaso ana tashii tang Britain senso agia aliba yong Suu Kyi-i Tir menden asoshi metokteptettsüsa tetsükdakba tulu ajurutsüsa kümogo.