Myanmar-i Rohingya refugee tem jangjaba mapa inyaktsü: Aung San Suu Kyi

New Delhi, September 19 (Agencies): Myanmar-i Rakhine state nungi jena aoba Rohingya refugee tem meyipa arutsü atema verification process kobi melii tenzüktsü, ta Mongulbarnü Myanmar State Counsellor Aung San Suu Kyi-i metetdaktsü.
August 25 nü Rohingya Muslim telungpurtemi sepaitem amakba sülen rara adok aser iba ajanga Rohingya nunger 410,000 shi Bangladesh nung jenok.
Tanü Suu Kyi-i iba rara adoker yimjak nung mezüngbuba o jembidang, lar sorkari nübortem timtemba tekaratiba nung anendaktsünür, ta ashi.
“Onoki Myanmar ya tamangba mesüra kin lemsar aliba linük ka mesüdaktsünür” ta Suu Kyi-isa shisem.
Suu Kyi ya küm 15 tashi house arrest nung liasü. La ya democracy pusemba lennir ka lir aser lai human rights alema inyakba aser ozüng alema mapa inyakba aitsü.
“Human rights alema inyakba aser ozüng alema mapa inyakba ajak onoki aitsür. Onoki state ajungalen yimjung aser tensa süngjema ayutsü atema tenangzükba agia inyaker” ta laisa metetdaktsü.
“Onoki kechiba nisungtemi linük toktsür aotsüsa aküm ta asüba kuli bushitsü. Kechiba kar toktsür jena ao aser kechiba karbo jena mao ta asüba kuli metettsü. Rakhine state nung Muslim nunger aika linük toktsür aoertem rongnung maden. Sorkari iba Rakhine nung aliba aliba kintem ajak putepa alitsü atema mapa inyaker” ta Suu Kyi-isa shisem.
“Myanmar ya kanga dang temeyoktep linük ka lir aser alimai onok dak tenük yoka reprangba atema onoki shisa mebulur. Burma ya temeyoktep linük saka nisungtemi mapang tatsüka tsüngda onoki tayongzükbatem ajak koktettsü ama bilemer. Ajisüaka, ibaji tamakoktsü saka onoki Rakhine state nung telemtetba tajung ka agitsü atema mapa inyakdar” ta laisa ashi/
Laisa international observers dang lar linük semdangtsü aser pei tenüng agi kuli angutsü atema pelashishia jaok.
Suu Kyi’er tanurtemi British senso agiba ajanga la linük nung Tir inyaktsü nokdanger saka lai state counsellor aser foreign minister mapa inyaker.