Na mokokmin nung lir asüng !!

Pai Tsüngrem tejak tepela agi angur; Aser pai nisung nem pa temeshiba shia agiatsür, Yob 33: 26b
Alima nung meimchir aika pei khuret aser pei mokokmin jenti bener anisüngzük makai lir. Nisung aika pei temang nung tashi mali aser tashidak jenti agi kangshir, ana aika pei jakla mazüoktetba ajanga kangshir, ana aika makamait tia nung pei taküm aser pei kibong koda masüba tia nung lir. Iba mokokmin tia ya asen sasa bener aruba kar lir aser karbo Tsüngremi asen taküm aser asen kibong tamang tetendangba yokba lir. Ano karbo asenok ajemalua kümdaktsütsü asoshi iba mokokmin ya ajurur, Asenoki Yob taküm to kodang reprangdir, alima nung nisung tajungsang, takar aser temetetsang, ajungben dang pa mokokmin tia ai, pa ali shi aser tanela aser shisatsü ajak nung kangshi aser ashiba jenjang nung liasü. Yob, pa tenüklang nungi teküjong tashi komo agi asung aser pa aut ma nung amen kechiba sura pa second ishika danga ayonga linü aser iba tashiba manungji pa kinungtsü Yobi atalajaa liasu. Saka Yob iba mokokmin tia nung liaka, Yob 33:26b nungji, Yobi yamai ashir, o Tsüngrem ni Nü tejak tepela agi angur ta ashir… Ya tesüngmangtsü ka lir.
Temeim adianu, na kobala mokokmin bener shisabulur? Asen mokokmin dang nungi Tsüngrem tashi ain tuluba lir. Asen tashi mait mokokmin nungji Tsüngrem nem kongshidakjang, meyimlaba temelenshi asen dangi arutsü.
Sarasadem : O Tsüngrem kü mokokmin ajak nü nem agütsür; Nai yaritsü tamang teyimla. Amen