Na tzürar asü? (T.Ken 63: 1-11)

Dawidi iba ken pa Yihuda arem tzü makadak alidang zülu. Dawidi tzü maka timtema alidang zülubaji reprangang, “O Tsüngrem, na kü Tsüngrem lir, ni na yakta bushitsü; takong aser tzü makadak tebilemba lima ka nung kü nülai na asoshi tzürar aser kü takümi na asoshi yongyar” (t.1). Dawidi züluba oji yamaia ashitsü akok, “Ni yangi takong, tatsük, lendong aliba arem, aser ni atangji tzü ishika aginer. Aji saka, shidakba ni taginübaji Tsüngrem lir.”
Kodang nai nesasa na tzü makaba arem ka nung ne taküm lir ta metetra nai kechi inyaktsü? Dawidi metetba jenjang nungji anidakang. Mezüngbuba, pai Tsüngrem bushi. Tsüngrem kidang Pa sentsüwangshi anguba ama pai Tsüngrem ain aser sentsüwangshi ngunü. Pai aremji Tsüngrem alidak kümdaktsünü. Dawidi süki nung liasü. Pai Tsüngrem sentsüwangshi angu saka pai idakji temulung masü. Asenoki Tsüngrem indang angashir temulung asür aser tenla kidang pa ken atener. Aji sür asenok aremi arur. Asenoka Dawid amaji asütsüla aser ashitsüla, “Ni Tsüngrem külemdak Pa sentsüwangshi anguba ama iba arem nunga Pa sentsüwangshi nguner.”
Tanabuba, pai Tsüngrem moatsü, “Kü taküm ali tashi ni na asangtsü, ne tenüng nung ni kü teka mekangtsü” (t.4). Ano Dawidi Tsüngrem den temulung süa liasü. Mulungsü tesülen mapang tia nungi marur. Ibai telunglen temoatsü nungi arur. “Kodang kü yipten nung ni na bilemtetter; aonung tiprong nung ni ne dang shisadanger” (t.6). Tatemsa pai Kibuba dang pela. “Saka chubai Tsüngrem dak pelatsü” (t.11). Ibaji Tsüngremi arem nunga asenok nungi aginübaji lir.
Arem nung ajangshiba temetetbaji na atema tajung lir, kechiaser iba jagi ne dang tongtipang ochiba sayur: Nai telunglen mulungsü temoatsü agizüker. Kodang nai taküm nung arem tia ajurudir Dawid yimyaji inyakang. Tsüngremi ne nüngdak agütsütsü.