Nadia nung Tenla ki kari raksatsü

Taherpur (WB), July 10 (Agencies): West Bengal, Nadia district kübok Taherpur nung mejangjaba nisung kari Tenla ki ka raksatsüogo, ta tanü police-i ashi.

Yasüng tesü mejangjaba nisung kar senti oset auyatsü nükjidong nung St Thomas Catholic Church telungi aita liasü, ta Nadia Superintendent of Police (SP) Bharatlal Meena-i ashi.

Tanep Tenla ki anepalusang jagi tongti kikümbangji lapoker angu aser oset aika raksatsür kima toktsüba angu, ta police-i ashi.

“Tenla kidang sentioset kecha nunga mekongshii liasü, saka tongti kikümbang den kichiba ajak telunglen nungi shidanger liasü nung kodaser parnoki telungi aittet’ar onok süngmanger,” ta Taherpur Police Station nung police ketdangser kati ashi.

“Tenla ki ketdangsertemi onok nem iba osang metetdakja liasü aser auyatsü merangba ken o ka onoki benokogo,” ta pai ashi.

Father Satish Makal-i ashiba agi, Tenla kidang aliba ‘ciborium’ aser ‘tabernacle’ naji Tenla kima intoktsür liasü.

St Thomas Catholic Church ya Ranaghat Church nungi kilometer 25 shi pila oor lir. Taküm March ita nung Ranaghat Church nung ya nisung teneti auyaba sülen Nun ka tashiyim amshia raksaja liasü.