Naga Club mapa bilemtetter

Naga kin atema yimten temeten indang jembi tenzükba telokji Naga yimten otsü nung Naga Club asütsü. Angazükba agi, alima mezüng rara nung Naga kin shia nungi nisung shimtetter British sepaitem khu bener France tashi oa senzüdang, Naga nungertem jagi alima kintem pei yimten temeten indang jembiba angashi aser pei lima asoshi taküm bendanga agüja raraba angu. Item tatalokbatemji Naga nungertem asoshi yimten tenük lapokba mapang ka liasü. Alima kin kati ka amokbangtsü meranger aser India ama tangar kübok aliba kintema tangar yimten talenba kübok melii alitsü atema nüchiso asoshi  raraba mapangji alima aso 20 buba tenzükba mapang ya ka liasü. Iba ama mapang ka nung, Naga nungersa süaka tanü ama Naga nunger o Naga nunger na junga memetettepi aliba tensa tia ka nung Naga nunger ayongteper “Naga Club” tenzükertem shisatsü aser tangatetbaji tulu liasü. Aji oda, Naga nungertem ya bendanger kin shinga kübok melii mejamejaa Naga yimten yimsüsüba aser sobaliba kübok alitsüla ta angatetba aser mulungtetbaji Naga nunger Naga Club nung adenertemji lir. Aji oda, 1918 küm Kohima nung Naga Club tenteter aliba mapang 1929 küm British government-i India lima yimten tensa tia asadangtsü asoshi Sir John Simon-i anir teshimtet pur kar yok. Ibayongji, item purtem dang Simon Commission ta aja. Iba Commission nem Naga nunger ajak tenüng nung Naga Club-i January 10, 1929 anogo nung tezüluba nung, kodang British nungertem India toktsür odir, Naga nungerbo India kübok masü saka balaka tokjang ta zülu. Naga nunger yimten nüchiso asoshi mezüng ola adokbaji Naga Club-i Simon Commission nem agütsüba shidi nung shia aliba o ji asütsü. Iba anogo nung jagi tanü tashi Naga nungertemi Naga yimten temeten asoshi maneni raraba otsü ya zübazüba angar toktsütsüla otsü ka masü. Iba rara nung Naga nunger kibong timmatemba aser takoksa manguba kibong kata malitsü. Tanü Naga Club tenzüker küm 100 ajungba den item lenirtem aser parnoki Naga yimten nüchiso asoshi nokdaktsü tenük lapoktsüba mapatem  bilemteta Forum for Naga Reconciliation (FNR) teloki tang January 10 nü Kohima nung ” Naga Day” sentong tuluka ayongzüka lir. Atangji, iba sentong ya temenungratsü sentong ka asütsü. Iba sentong omenji ” Naga nunger tebendang kecha mali” ta agüja lir. Atangji, Naga Club-i Simon Commission nem Naga yimten temeten wazüka yutsütsü asoshi agütsüba shidi nung Naga kin ajakbo mali. Malirtem rongnung Ao kina dena lir. Ajisüaka, Simon Commission nem agütsüba shidi nung tenüng malir Naga kintem jagi Naga nunger yimten temeten asoshi Naga Club-i jembiba aser inyakbaji magizüker ta masü saka Naga Club-i Naga nunger asoshi inyakba mapa ajakji agizüka tanü tashi kasa tangatetba aser temulungtetba nung Naga kin ajak nokdaka lir. Tia majung, Naga Club tenzükba nungi NNC aser NSCN tenzükba tashi nung, Naga nunger yimten temeten asoshi nokdakertem rongnung telok  aika küma telemsa adoka lir. Iba jagi küm 90 tashi nunga Naga Club-i Simon Commission nem agütsüba Naga yimten onük mapa küma mataloker. Tanü Naga Club tenzüker küm 100 ajungba mong amongba mapang ya Naga nunger ajaki Naga kintem kong lidir liaka, asenok ajak ya kibong ka chir ta bilema putepshiba mapang ka asütsüla. Tanübo Naga Club junga tenteta meliaka, Naga nunger ajak Naga Club züngsem ama peisasa angatettsüla aser asenok yimten nükjidong nungi mepilai asenok ajaki tarutsü Naga lima aser lanu putu meima akok tashi memenui India den telemtetba kati arutsü merangtsüla. Küm 100 jakdang, Naga nunger tsüraburtemi Naga nunger ajak Naga yimten ka kübok alitsü jangraba tangatetba aser mangdangji tanüa asenoki mesepdaktsüi, tanü putu tensa dak apet asenok yimten aser loktilibaren nung putepa alitsüba tesem aser inyakyim ka asenoki yanglutettsü merangtsüla.

You must be logged in to post a comment Login