Naga Hoho-ang anentsü asü ?

Kodang aser koba nü India den Naga yimten telemtetba kati arudir, idangjisa parnok nem yimten tasen akümtsü asoshi maongka agütsütsü atema Nagaland Legislative Assembly nung MLA 60 prongla anentsü ta akhidang nungi telemtetba lir aser kasa terenemba aser temulungtetba aser tangatetbaji tang mena alir parnok MLA 60 pronglaia mulunga telemtetba agia lir. Kasa tangatetbaji yashi Dimapur nung NSCN-IM teloki  Naga nunger kin shia telongjem aser lokti tentetttem den shisalemsateptsü asoshi jazükba senden nung Lok sabha MP Neiphiu Rioia kodang südir süaka Naga yimten tasen ka kümteta aotsü atema maongka agüja Naga nunger MP anapronglai menden nungi anentsü mulunga lir ta metetdakja liasü. Ibaji parnok yimsüsürtem anemsü o masü saka shitakba tangatetba aser temulungtetba ken o südi ta angatetter. Aji oda, jungjunga bilemdangra, kodang aser kobanü Naga yimten telemtetba tasen ka bener arudir, Nagaland tatar senden nung aliba MLA rokerpronglaji anennü manennü ta masü saka anentsüsa akümtsü. Ajisüaka, tang NSCN-IM lenir Th.Muivah-i yashi lokti senden nung metetdaktsüba ama, kodang Naga nunger alidak alushi aser nütsüng ajak ayimbanga Pan Naga Hoho ( Naga Parliament) ka kümtetdir, idangjibo tang aliba Naga hoho ya anentsüsa akümtsü amai yimdangi arua bilemer. Aji oda, ibaji shitak atalokra tang jembidenba amato Nagaland MLA-tem masü saka Naga Hoho-ang anentsüsa akümtsü. Atangji, NSCN-IM leniri ashiba ama, Naga nunger aikati Naga nunger India den balala alitsüsabo yimten nüjiso mengutettsü ta angatetter, anungji Naga yimten nüjiso bener marutetaka Naga nungertem ya senso tajung ka ama pei lima nung meraketa litettsüsa India den tangatettep ken o tajung ka renemtetra, ibajiang Naga nunger ajak asoshi tajung asütsü. Atangji, August 3 nü NSCN-IM o India sorkar na tsüngda renemba ken o nungjia Naga nunger o India nunger na tsüngda yimten tashi lemsaa abentsü atema tangatettep nung sign sütepogo ta angatetter. Aji oda, parnoki angatetba amaji Naga nunger ajaki tanü tensa alima yimten  tia angateta lirji, shingaia nunga ta mashitsü ta bilemer. Iba jagiang August 3 nü renemba ken o ji menguaka osang kisüng angashiba agi Naga nunger ajaki pelaa agizüker südi. Ajisüaka, Naga nunger asoshi tebilemtsü tulutibaji August 3 nü NSCN-IM o India sorkar na tsüngda renemba onükji masü saka kodang südir süaka Naga yimten telatetbaji tangbo Naga nunger ajak dena Naga nunger ajaki agizüktetba ka asütsüla ta asüba tangatetba ka lir. Atangji, ibaji kanga shitak lir. Joko, jungang tejung Naga yimten latetba maparen nung Shillong Accord ama mesüra 16 Point Agreement ama Naga nunger kar aden aser kar maden ta masütsüsa latettsübaji kanga tenüngdaktsü kümogo. Anungji, menuyonga kangabo mariteptsüla ta bilemer. Iba ama mapang ka nung FNR teloka kanga nüngdak amai bilemer, kechiyong kodang südir süaka Naga nunger NSCN aser NNC telok ajak dena Naga yimten telemtetba agitsüla. Atangji, Naga nunger alushi ajak yinten ka kübok alitsü asoshi Pan Naga Hoho tentettsü apitetba shisatsüki junger. Ibaji tang aliba Naga Hoho ulushia yanglushiba amato ka asütsü. Tangbo Naga Hoho dak Naga nunger ajak atema sobaliba aser ali rongsen dak aketba temzüng ozüng yanglutsü tashi mali aser senotsüa sorkar senpong nungi lemzükja mali saka kodang Pan Naga Hoho tentetdir, idangjibo Naga Hoho dak temzüng ozüng yanglutsü aser itemji mapa küma inyaktsü tashi alitsü. Iba dakji alaka ano Pan Naga Hoho mapa inyaktsü asoshi India sorkari küm shia senotsü balaka lemzüktsütsü. Joko, Naga yimten nüjiso tenüng nung reshikangshi majuruner aser Naga nunger tsüngda azü tokshiba anogo majuruner, anungji Pan Naga Hoho tentettsübajia junger ta ajaki shidi. Ajisüaka, idakji akok tashi Naga nunger NSCN aser NNC telok ajak adentsüla aser külemi jembitsüla aser külemi latettsüla. Ashiko, India den Naga yimten ken o NSCN aser NNC telok ajak ayongloker jembiba ajanga ano 3rd August nung renemba ken o dang nungi tajungba nung renemtettsüa akok. Iba taginüba ataloktsü asoshi Naga nunger lenirtemi maneni inyaktsüla.