Naga Khristantem-i ya khen arokaroka shisadangang

  ~ L. Ngangshi Jamir, Mokokchung Village.

India nung BJP Government arur külen nungi Khristantem rishikangshi tali akümba, Tenla ki rongdoktsüba, taochi makai rishikangshiba, tepsetba mapang shia osangkaket nung angur. Aiben ataloker külen ang osangkaket nungbo khenkhen ang adoktsür ta asenok ajaki angateta lir.
Tamil Nadu nung Pastor ka tepsetba indang Tir Yimyim January 24, 2018 adok nung Tir Yimyim azünger ajaki nguogo. Pastor Gideon Periyaswamy ya kanga bendanga agütsüba sannüker ka liasü. Par Arogo nung nütsüng kanga kara-a aren. Hindu nungertemi aji kanga maginü. Parnoki iba Arogo ya samatsütsü kanga merang, taoba ita 6 tashi iba tesem nung aliba Hindu nungertemi pa ya tepsettsü amungnü shia amokmerena aser merenshia aru. Parnoki pa den rara menatsü kanga merang, saka pai aremzüka dang aru. Pa tepsettsü amokmerenba indang police station nunga report agütsü saka police-ia züzüa dang toktsü.
January 19, 2018 aonung pai par Arogopur kibong ajak semdanga ao, aser Amungnü (January 21, 2018) anepdang 10:00 ako nung sarasadem mapang alitsü, anungji, yimlibilema nenoki arua Tenla Ki merükang ta par Arogopur kar dang pai ashi. January 20, 2018 aonung Hindu nungertem jagi Pastor baji tepset, saka pa sasa-a aletseta (suicide) asü ta bilemdaktsütsü asoshi lisü ka kilem nung sendaker alubaji pa tekong nung alena liasü. Saka pa tepseter lisü jagi sendaka yutsüba dang liasü, kechiaser pa temokok agi ali nung tsükiter liasü ta ashir (Pa sasa-a aletseta asü ka asü nungbo tetsüng jagi ali metongi sangzüa lila).
Amungnü January 21, 2018 anepdang teyaritepertemji 5:00 ako nung Tenla Ki merüktettsü arudang ang yamaji ataloker alibaji ngua parnok kanga aoksa, mezüngbo police-temi iba keno benoktsü memulung, saka anasa aliba yimtsüngtem nungi pastor-tem arua Arogopurtem den külemi lenmang mokdangba sülen pa temang ya Chenalputta Govt. Hospital-i bener ao ta January 24, 2018 Tir Yimyim adok nung asenok ajaki nguogo.
Hai! Temeim Naga Khristantem, Khristantem rishikangshir item taochi maketba telok ya asen Naga lima nung kibur kümdi asür. Parnoki asen lima arakmoka yimsü asütsü meranger. India lima ya Hindu temeja lima akümtsü meranger. Khristantembo meshimeshia samatsütsü atonger. Khristanpur rishikangshiba, tepsetbabo manener, saka An-i scü chir tebang aidokba ama BJP Party-i tamangba yimsü ajak dang kasa benshir, ajak nem kasa temeden agütsür ta osangtem nungbo agütsür. Par tai nübur ajaki ngudakmunga parnok tai kecha malia ta odi odia tiyazü jembiba, menja apunger atsükshishiba ta ashiba ya parnok ama dang ya ashiba lir.
NBCC-i anir Nagaland Baptist Arogo Mungdang-temi “Clean election” sentong renemer inyaka arudagi, Tenlaki shia nung Clean Election Nissan asongtsü lemteta songa lir. Arogo tenzüker kibong ajak nung, temulungertembo kija kibong nunga asongtsü jembi. Saka Arogo kar nungbo Tenla Kidang-a songa mali. Arogoi ang anepalua inyaktsüba, saka Tenla Kidanga songa mali nung kija kibong-i kong nungi asongtsüba? Ya Arogotemi Tsüngrem tsüngdang sentsüh tulu ta mebilemer no? Lai O-i kechi ashir? Mamangertem den meputepi süngra külemi taputep, kechiyong temenen den temeshiba kechi nung puteptet? Aser ammang den Khrista kechi telungjem ali? Mesüra mamanger den tamanger kechi shilem aka? Aser süngyanglu den Tsüngrem Tenla ki kechi nung puteptet? II Korint 6: 14-16.
NBCC-i anir Nagaland Baptist Arogo Mungdangtem aser Arogotemi kechi bilemer? Kechiba ola madoker? Alima yimya danga kecha masüa ta sür dang toktsütsü asü? Sen ngurbo ojang danga ta bilemer asü? BJP Government arurabang Centre nungi sanction talubosoa arutsüji aji tajungba danga ta bilemer asü?
Israel nunger Persia Chuba Ahasuerus bangdak kübok alar tia nung aliba mapang Israel nunger ajunga tepsettsüba mapang ka aru. Iba mapang nung Mordekai aser Esther na langzütepba, Esther 4: 1-17-ji sarasadema züngdangang.Yangibo tekong ana Esther 4:13-14 dang agütsür- Ya Mordeka-i Esther dang ashiba O lir, “Yihuda nunger ajak yutsür nabo Chuba kidang jenbutsü ta ne sasa-a tebilem, Kechiyong iba mapang nung na khenyongi ola madoki lira idangji tanga tesem ka nungi Yihuda nunger dangi teyari aser tekümzüktsü arutsü akok, saka na aser nübur kidongbo samatsü, aser ibala mapang asoshi na chuba yimli jagi arua alitsüa shibai metet?
NBCC nung lenirtem nungi tenzüker Mungdangtem nung aser Arogotem nung tenzüker tenzüklatem, iba ama mapang ka nung Arogoji, santemji kümzüka ayutsü atema nenok iba tenzükba atadakja alitsüa shibai metet? Anungji lenirtem, nenok pei ajaba aser shimtetba shitak metettsü kanga merangang II Peter 1:10. Arogotem dang Tanela-i kechi ashir shiba tenarong aden pai aji angang Jungkai Adok 3:13.
Asenok Naga nungeribo lokti tentet ajaki Election masü Naga Yimden latet tama ta lemtetogo, saka Election Commission of India-i kechi shidir iba dakji ang keta lir ta bilemer. Tip külen Election-ji magiyonga Naga yimden telatetba kati maru tashibo NPF Government-ji anener Centre Government-i dang atsüshitsü alitsüji idangji ang BJP teka sangdema aita amoushitsüji asenok atema ibaji ang tamajungba asütsü-a shibai metet. Yimden latettsüjia Centre jagi mapang kobika amshitsü asenoki meteta maka. Aser State nungjia RSS nükjidong nung dang, Hindu yimsü-yimi dang anitsüji asenok atema mapang tajungba kabo masütsü südi ta bilemer. Anungji political lenir ajaki, Civil Society lenir ajaki, Tribal Hoho lenir ajaki aser Baptist Arogo Mungdang lenirtem ajaki kanga kümdanga mita atatsü nüngdak-a ta kü tangatetba lemsateper.

You must be logged in to post a comment Login