Naga nübur asadangba

~ S. T. Yapang. Lkr., Kohima

Otsüla obuola nunger mapang nungi ochi aser tongmelang shisatsü dener aruba tanü ajungbenaka melenshiba yimya tamajung asadangtetba kar yamai :
1. Odia auyatsü aser ashioktsütsüji kar dak alaka shingaia memulunger, saka kuli tajung ka atemer miimzüka sen agitsüji ajaki amai mulungsoa lir. Tatishitsü agi, scholarship angutsü metemsüi alirtem sen ishika asoshi kibongi sen aika arur sürnung sen ishika dang arur ta tai züluba, mapai mao sürnung tiyazü nung TA/ D.A yanglua agizükba.
2. Ochi jembia inyaker nübu adoktsü ajaki yongyar, saka aji pei jakdang aser pei inyakba mapa/Department nung masü tangarba mapa/Department nungji dang jungkai adokdaktsünür.
3. Pei inyakbaji dang ochi aser tangari inyakba nungji dang tai aket, maparen kar nung pei inyakba nung ochimashitsüsa ajurura aji koda masüba dak tongloktsür.
4. Sen timba angutsü asoshi ajaki mulungsoa lir, aji junger, nüchi shisatsü adenba yangji jangjar, saka ochishia, mapa meranga inyaker angutsü yongyarbo apara.
5. Yimten yimsüsüri aibelenba mesüra sensaker asoshi aruba sen ajak chimatsür, saka iba anema ola adoktsübaji tangar khuret ta bilemer. Itemla anema ola adokra kinunger aser adianu ajaki tetsübu nung ibaji nembangtsü ariteper mesüra aibelener denji kinunger kar ajanga metettepa alitsü, tesüsa tajungren agi tembanga yutsür, kechiyong tangar ochimashi dang jembia kazütsüji jangrar dangashi ‘ibaji anema noktaktsüla’ ta asüba aser ‘ibaji kü shilem’ ta angatetba nisungtem shisatsü nungji khenyongi mali.
6. Pei agitsü nung tasü tait, tasüa majemer, saka nübur asoshibo tasü mait aser ochi jungkai adoktsüba nung kangasa tasü mait, talisa sorkar tenzüker aikati pei mapa metoktsünüdang ochi miimbangba angutsü.
7. Sensaker, timtemer, shiranger meyong sen odia achitsüji shingaia memulunger, saka inyaker tsüngda tangatettep ka yur item sen ajak achitsüjibo kar dak alaka ajaki amai mashi mapang ka nung renema dang lir, aser ibala senji temoatsü ta züngshir.
8. Nisungtemji tema, moapu, lokti tsüngdang sen ngura san chanu temesüngtiba amai akümer, saka kilung aser tammangdak sen ngura khenyongi taochi mali, Item kulitemji NRHM nungi 2009-2013 küm tashi shiranger asoshi aruba sen shiranger ket junga madong samaba; Health & Family Welfare Department kübok mozü center sokari approve süa alidak sen talangba nung masü kangshia memetetba tesem nung aliba, yamaji asünung dang taliba kuli (cash memo) talila yanglutettsü, kechiyong sorkari tuyuba nungjibo ochi dang yanglutsüdi ta asütsü akok aser mozü tajungba den sen talangba agi angutsü, item amala aibelenba kuli bushidangra shiti nungji kanga junga tesüngmangtsüka renemteta lir, aseni bushidangi ao nung aseni ang meyiper parnok inyaker nem sen agütsütsüsa parnoki ang timtemer asoshi sen talila inoktsüa ali ama sayua lir, saka senbo maka aser timtemer ket junga matong. Maneni Education Department kübok matamabensar asoshi alakteta sen crore 12.79 (12,79,50,000) Inclusive Education for the Disabled at the Secondary Stage 2011-2012 aser 2012-2013 küm indang sen ochimashi amshiba. Item amala shiranger aser matamabensar sen chitsüali nung kodaser tetsüng teben shitak aketer sen chitsüba züngdangmatsü? Anosa yimdaklir sensaker, ayangdak makar asoshi MGNREGA scheme ya tenzük, sürnung iba ajanga yimdaklir sensaker, ayangdak makarjibo jenjang tajungba makümer. Tejashitsüji züngya 5 buba nung shia aliba den semloka Department kati ochimashiba bushia kaktettsüra tarutsü nung iba Department jaki pei yimer/yimdenji memeimtsü ta tetsübuba shisatsü nisungtemji dak lir, sorkar tenzükerji nübur tenzüker, saka aiben parnok senpet agi külemshia külemer dang scheme balala bener aruteter, ibai pei temeten memetetba aser tasü maitba ajanga lir (Department nung senotsü ochi mashi amshiba anema noktakra Department-i tarutsü nung ner yimerji memeimtsü ta tsübua lira aji pei sasa ashioktsüba mapa ka asütsü, shirnoki pei temeten shitak amshir; itemji tangari akhümtsübur aser pei meyongji mebushidang yongi bener arutsür). Tekalen shia aliba rongnung karbo Tsüngremi mulungbaka süra kenü anogo okadak jangjatsü menua mali. Tetamatsüji ochimashir ketdangser ajaki ama pei yimtak timtemer aser arogo nem tenla tulu agütsüba kuli lir. Karibo kin tila, sensaker arogo tenla kia sütsüogo, item tenlaki kima “Tsüngremi moatsüba nungi iba tenlaki/Sarasadem ki ya Mr & Mrs *** par kibongi sütsü” ta zülua kar.
9. Pei yimer adianu dakbo tai tilaka lira iba nüngtem nung meyaritsü, saka tangarbo tai tuluka aliyonga tajung amai dang sayur asünungji temulung lemteter.
10. Tangar makokerji pei yimer, kinunger arishia tenükmeremer, saka tangarbo mangu amai yutsür. Tangar den toktepa aotsüjibo asen shilem masü ama bilemer.
11. Timtembo ajak dang shinür, saka sen melamela angutsüba lenmangbo melemsatepnür, anungji memetetba nübu nem ashiokdaktsür. Tatishitsü agi, “lottery nung na sen paikaji nguogo, iba senji agizüktsü asoshi jilia sen tera yokang,” ta ashir. Sen angubaji shinga nema memetetdaktsünür asünungji miima inyaker, tesüsa asenjiang ashiokdaktsür. Ano takar kidangi aodang asen langka meshii aruba amai par makaba aser timtemba otsü shia amungba aika angutsü.
12. Tsüngrem tenzüktsüji sentep kilung nung dangashi kima yimdong nung tenzüknür apara. Tsüngrem tenzüktsübo jangrar, saka arogo aser nisungbo metenzüknür. Lanur aika Tsüngrem tenzüktsü nangzüka ayu aser tejangraba ano mesama, saka kong tenzüktsü memetetba nübu aika lir. Kuli aika lir, saka ni ka shidi, Tsüngrem tenzüktsü nangzüka ayuba lanur ka ajuru, la Laiputi (theology) azüngi aotsü ta ashi, saka sentepi maor khenkhen arogo nüngtak nung yariteptsü asüngdangaka memulunger. La amaji Tsüngrem dang tenzüknür, saka nisung aser arogobo metenzüknüba pur aika lir. Kobanü Laiputiji züngtemer tenzükba mapa ka nung tetsüng ajemokdir ibanü nung jagi dang Tsüngremji tenzüktsü tejangraba, ibala tenzüker sülen shibai anidaktsü ?
Tekalen shia aliba ya asen sobaliba masü, saka tangar dang ajizük asü asen lima nung poktetbar memetetba jakla lir, tajung tsütsülena nüngtakra mapang tetemsü nung asadangtsü. ‘Nenokia iba jakla/yimya ya shitak asü tai ta ashir?’ ta Tsüngrem tenzüker, kaketshir, alima wadang balala nung alir, yimdak aser jila balala nung alir nisung 50 den timba dang ngutepkaket (facebook) ajanga asüngdanga liasü, parnoki pei bilemba lemsatepba nübur ajak tajangzük angutsüsa alibatem kar yangia lemsateper:
TOSHI JAMIR: Takoktsüa sür, Nagalima azük nung tua mener Naga nunger libaliro ya repranga kazü nungbo menüba agi teboka ashitsü. Mapa tamajung ka inyak nung ‘kukua aitsür’ ta osang kaket nung anaben asemben adokerbo joko keno tatem, tebushidangba maka. Ano aibelener kar pura takar tulur ka süra mesüra kinunger tulur lira police station matongdang yongi ‘chiokang’ ta osang arutsü koda tejashitsü! AYATAI! NAGALIMA.
Wati Ozzy: (1) Nia tesayur ka asünung küm 5/6 shi tsüngtsüklongtsüker koda school nung anepalutsü aser parnok nem teyari agütsütsü atema tenüng zülutsü yutsü, saka item teyari kodanga magütsü. Ajisüaka item tulurtemji kar alima nungi pilar aser kar tashitak kaor shiranga lir. (2) Naga nungerji ajak Khristan dang, saka Yisu dak amangba ya lenmang kar nung aibelena amanger ta nibo bilemer, kichibasüra sen tera angutsü atema certificate/scholarship ama nung meteta tai zülutsür, iba ya joko yimya ka ama kümogo. Süra asen Naga nunger Tsüngrem dak amangba ya anema alitsü, temoatsü meshitsü ano lendong balala nungi kümzüka alitsü aser tashitak tamajung agi memeneptsü meji amanger ta asadangteter. Kichibasüra tekümtet asoshi amangra Naga nunger yimya itemji khenyongi malitsü, anungji iba ya tamanger shiai angatetra Naga lima ajak melenshiadoktsü ta lemsateper.
Tsupati Aier, Lengrijan, Dimapur: Sorkari nübur meimyong sorkar kaket reju VEC kübok yutsü, aser VEC-ji tangar masü pei yimer senso tajungtem dang, parnoki tanurtem tajung kümdaktsütsü atema mapa shitak inyaktsü melena VEC-i anir tangatettep nung proxy teacher nem sen tera agütsüba ajanga tanur nem education junga magütsütetter. Govt-i itasen menutsüra yimyim ayima longkak aiter, saka pei indang shitakba mapa tangar nem nongloka toktsür morumorua nemzür.
Lanupokyim Longkümer, Longsa:
1. Yimten yimsüsübaren temzüng ozüng makang (kor yongrak), tanak dang ‘tanak’ meshitet, sübokrem yong pei ochi temeten nok yoktoker.
2. Tsürabur aser tanur tsüngda aikati mashibangi maaksütsü o jembir.
3. Teret janga meranga inyakba samadaktsü; koba Aor/Naga nunger sobaliba tajungtiba ka liasü. Iba melena ochimashi, auyatsü aser azümesena amajok mapa nung mapang intokmar.
4. Pei bilemba dang atalokteta/tongteta inyakerbo pi indangbo kheni mebilemtsür.
5. Tenzüker aika pei tenyaba wadang aser tajaba nükjidong maka tenüng agi inyaker.
Soyimyanger Aier (Mopungchuket) Kobulong:
1. Naga nüburtemi joko tiyazü jembitsü aser mapa tamajung inyaktsü arentaka, tsübua mebilemer.
2. Sorkari ochi ajanga, tangatetba tajung aketba tesayur meshimtetba yong kaket reju nung kaketshirtemi shisatsü tabensa mangur. Asen lima kaketshir lokti tentet aika aliba lima ka lir, saka reprangdangra kaketshir lokti tentet aika nung memeshiba yimya amshia angur.
3. Alima ka ajungtsü asoshi ochishir tangateter nüngdak. Asen lima nung ochimashi, tesempatep, telemsatep aser tamajung nung tepukümtepba onsara aliyong tangatetertemi ochi mapa sadema meinyakteter. Alima ajak nung tamajungji lir, ajisüaka asenoki kodang alima tajungtem asadangdir parnok tamajungertem denji toktepteta tangateter, ochishirtem lir, saka asen limabo tajunger dang nungi tamajunger timba.
4. Arogotem nung anemsü tamang, alima rongsen benbuba meshimeshia malitsüla, saka ibala nem ang anishidaktsür.
Pangzang Walling (Khar) Ao Kashiram, Dimapur:
1. Nagalima nung Tsüngrem osang mangashir mali, ajaki angashiogo, saka Tsüngrem O bo pei tetsüng agi ajemshipet ajemshir.
2. Tsüraburbo anogo piyong tzünglu agi ajaa mesüra anü pua chirnur asoshi asentzü alua inyakteper, saka chirnuri meyiper yaritsü melena seplepsepjia süoshi tajung dang alia chiyungtsü tajung dang chinüba nübu jenti poktetogo.
Merensen T. Pongen, CHUCHUYIMPANG: Tanü asen Nagalima nung meinyak, mesangshi, ayongayonga linüdang yimtenren lenir (political leaders) mashimashi shimteter, tarutsü tiabo kechiar memeteti khen ajung asadang alima rangpen raksar.
Rongsen Jamir: Asen Naga nunger Tsüngrem tenzüker aika kibong nung ajangshiba kaji, kidang tanur zünger mapa mangurji ta sür dept balala nung sen lakh ana asem Govt mapa atema tangar nem sübokrem/miima agütsüa yur kidangbo tepen ajak madena Tsüngrem dang “Oba Tsüngrem nai ozü jala, jabaso asoshi iba mapa ngudakjang, nai dang lenmang lapoktsüra ni aser ozü kibongi ne kuli asütsü,” ta mapaji mangu tashi sarasademer. Nibo item maparen ya asen Tsüngremia agizüktettsüa na? ta sa shisadanger. ‘Iba amala inyakyimji Tsüngremi mulungba masütsü, anungji aji majung’ ta shira “Tanü asen lima tensa agi yamaji dang, nenoki tanü tensa memetet,” ta dang langzür. Iba maparen nung dang masü lenmang aika nung asenoki Tsüngrem ya tanü tensa yari asen ajungtsü apia amshinür.
Tiamongla Lkr: Asen Naga nunger jila (town) balala nung soa inteter lanurtem asoshi asen oshi jembitsü kanga saksaka kümogo. Sentep aser lokti balala nung parnoki shilem tajung agitsü jangraka pei oshi junga mejembitetba ajanga aiben tetsüktaktsü ajurur aser telok/tesentepertema tzüra medemdaktsüteter. Ibai kechi tai? ta süra asenoki kilung nung tedi, tenu, kinungertem ajak Nagamese agi dang jembiba ajanga lir, yamaisa ora küm ishika sülenbo asen oshi tajung yaa samatsü, aser oshi samara asen ayak (identity) makatsü.
Menthy Longchar (Waromung) Lingrijan, Dimapur: Otsüla obuola nunger mapangbo sobaliba aser awashi ka ama kidang kiyonger aser kinunger putepa azüzüktepa lia aru. Saka tanü putu itemla ajak to samar pei ajung asa litepba ajanga adianu, yimtsüyimer, kinunger agi pi/ainer kümer alir.

You must be logged in to post a comment Login