Naga nunger ajak asüng pelaa aser sünepa alitsü asoshi mapang tajung alangzüktsüba anogoji tang ya lir

  ~ Tiala Imchen, Dimapur.

Aoli Watsü, Wabong, Kongru, Sapang tajungtem,
Naga lima nung naji mezüng tenük lapoker kin nungi adokba lir, anungji na tanü langtsüngi moi tenük, tokolok, tebilemba, shisatsü ajak lapoker, tang 2018 election nung yabo, tajung tamajung bendangteta ne senti vote-ji amshiangni ta, iba ocet okila nung kü mulungjang nung tarungba ka ayimoktsür.
Nisung shiai asen vote ka jagi kechi asütsü? ta bilemba shisatsü endokang aser asen vote ka jagi alima yimten yimsüsüba chuba menden yanglur ta angatetdi. Anungji asen vote-ji tematiba senti ta angateta, tang asen jakdang aliba election nung yabo asen vote-ji ochi mashir, ashikülaker aser auür Lenir shiri ne scholarship, ner jala jabaso indang scholarship tashi chitsüogo, ano ner chir sayurtem ita sen dena rakzüka chitsür nem, süpokrem meimba nem, pa aser par kinunger kisüng mejungbangtsü dang merangba nem, ano talisa asen Khristan state nung tanga yimsü amenoktsü merangba lenirtem nem, shir meshima aika lir, item nemji khenyongi asen senti vote-ji magütsütsüla. Nai yamala nemji agütsüra ne sasa na asongtsü ongken tua ayur ta metetang.
Ne senti vote ajanga nai ner lima nung ne Tsüngrem mekülemtettsüsa tensa tia malangzüktsüla. Naga lima ama Khristan state ka nung joko Good Friday aser Christmas amala tongtibang anogotem nunga aseni asen Tsüngrem mekülemtettsüsa tensa tiaji aseni metetsümonga malangzüktsüla. Tanü asen vote ajanga asüng itemji bendangtsü alinung, aseni asen vote-ji teim lenmang nung amshitsüla. Asen indang senti vote angutsüsaji iba candidate jagi temsüa lir mali? Tatishitsü agi, (1) Pa dak alima meimba tanela aser lokti tejakleni anitsü sempet keta lir mali. (2) Paji Centre level tashi nung oa Naga nunger ajungtsü indang jembitettsü nübu asü masü. MLA/Minister karibo sentong tila nunga shilem junga magitetba tema lir. (3) Paji Tsüngrem akümtsübur aser ochishir nisung asü, mesüra pa taküm nung khenbosa paa MLA/Minister inyakdangogo ta iba konangji aginüa ayirba asü? Itemji meteta aser bendangteta aseni vote-ji agütsütsüla.
Tanü aseni asen senti vote ya mekümdangi aser meshisadangi tangar o tanang dang angaa agütsüra mesüra senyong yokdokra tang dang nungi asüng asen lima tiajisa tamajungtiba asütsü. Idangjibo tsürabur shin-o nung ashiba ama nai jebaka nüktzü malutsüsa tensaji ajurutsü. Tanü asen Naga nungertem ya noklang shilem nung 70% i-bo pei kija ajungtsü bilemba (individualistic minded) shisatsü tamajung aketba par mapa inyakyim nung angudang kanga temulung ayanger. Talisa tang Yakbang nung mena alir alima lenir tulurtem aser takartemi pei kisüng takar akümtsü merangba jagi asenok dak jakla tamajung merumeru aser tokolok tila (narrow minded) sayur. Itemji ajanga asen lima tejakleni renloka aotsü lenmang shibangtsür aser item noksatemji tanü asen lima nung lenmang tajung ka danga mali, apu ajak chirepogo, hospital, institution telaor lir, aser industry tembo ajak anenogo. Iba amala yabo India lima nung kecha nunga mangutsü südi.
Ano asen Naga nunger temeden asoshi joko küm 60 tema rarayonga aor saka solution kati maruteti lir. Yamaisa mulungjemi lira nüjiso angutsübabo toktsür, 1950’s mapang dang nungia tamajungba rishikangshi timtem tia ajurutsü kecha menua maka kechiba süra kasa ozüng jagi tang tashi asenok alenbanga lir. Nütsüng nübur tulu tila, takar, sensaker ajaki pei teyanglur Tsüngrem dang kanga nüktzü yima asen lima asoshi mepitsü mapangji tang ya lir.
Tanü asen lima shirangba tashitaktemji tang shiyonga aruba amaji tapu balala aika lir, item rongnung tashitak tulutibaji Election nung asenoki shisa makai Lenir tai shimba ya ka asütsü. Iba den ano asenoki parnok dang asen vote yoka achiba ya asütsü. Itemji ajanga parnok adoker külen alima development nung indoktsüba sen jagi sentsüang aor aser parnok sentsü menokmar külenbo joko taruba election atema ang rongsen rezünga ayur. Anungji asenoki item inyakyim yimya tamajungji melenshidi aser taküm election nungyabo asenoki ochishir, linük meimer aser pa/la dak linük lenitsü sempet aketertem dang ochishia shimdi. Aser lenirtemia parnok adoker külen Tsüngrem akümtsübua Pai mulungba nung teimi yimsü asütsü merangtsüla. Süra Tsüngremi asen lima kodaser memoatsütsü. A. Shin 16:12 nung ashir, Chubatemi tai menabaji tesempatsü, kechiyong chuba mendenji temeshiba agi küma lir. Tsüngremi iba ocet azünger ajak moajangma.
“Mapang tajung ajak alangzükang, kechiyong anogotem tamajung lir.” – Efesa 5:16.