Naga nunger MP temi election matongdang yimtenren onük latettsü atema akhanger

Kohima, December 07 (TYO): Brihostibarnü Naga nunger MP tem aser taoba mapang MP temi sangküm küm tetenzüklen state assembly election magidangyongi Naga nunger yimtenren onük latettsü atema takhangba agütsü.
Tanü Jotsoma nung aliba Regional Center of Excellence in Music & Performing Arts nung 12th Assembly nung MLA tem, MP tem aser taoba mapang MP tem temeja senden ka mena liasü aser iba mapang nung parnoki, “India sorkar aser ken o jembiba nung shilem agir stakeholders dang taruba state Assembly election matongdang Naga yimtenren ken o latettsü atema mepishir,” ta bangzünga ayu.
Naga nunger MP temisa Election Commission of India (ECI) dang, ajaki agizüktettsüsa Naga nunger yimtenren ken o latetba sülen ang 13buba Nagaland Legislative Assembly election ayonga agitsüla, ta takhangba agütsü.
MP temisa NLA züngsemtem dang December 14-15 anogotem nung asükwa mongpu assembly senden amendang iba den kasa onük ka bangzünga ayutsü mepishi.
Tanü bangzüngji NLA Speaker Imtiwapang Aier, Chief Minister TR Zeliang aser Ex-Parliamentarians Association of Nagaland Tir, T Khongo nungeria agizüka liasü.
Tanü kasa senden nung NLA Speaker, Dr. Imtiwapang Aier-i Naga nunger yimtenren onük latettsü atema lokti tentettem, Arogotem, Mothers Associations, GB tentet aser kaketshir tentettemi tongtibang shilem agiba atema pelaba metetdaktsü.
NLA Speaker aser NLF Convener, Imtiwapang-i, Naga yimjung ken o ya kanga tongtibang tensa ka nung lir, aser iba nungji ajemdaker consultative senden ya ayongzük, ta metetdaktsü.
Ajaki agizüktettsüsa yimtenren ken o latettsü asoshi mera aika agia inyakogo, ta shia Dr. Imtiwapang-i, NLA züngsem 60-i Naga yimtenren telok balala aser lokti tentet balala den senden aika ayonga mena India sorkar aser Naga linük tenzükertem densema ajak dang parnok taginüba metetdaktsüogo, ta ashi.
Paisa, telok balala tsüngda tsükchitepba mapang nungi Naga tsürtemi “Joko azü tedokshi” yimyim nung ajemdaker yimjung atema inyaka arur, ta ashi.
“Iba denji kasa, FNR-i Naga nunger telungpur telok balala tsüngda apu latsübaji asenoki metetogo. Parnok mapatong ajanga NSCN telok balala aser NNC/FGN nungi tongti lenirtem NPGs senden nung adentsüsa lenmang lapoktsü,” ta pai ashi.
Speaker-isa Naga Hoho aser ENPO nungi lenirtem NSCN (K) lenirtem ajurutsü atema Myanmar-i oa India sorkar den tanaben ceasefire tezüngzüktep agishitsü atema mepishiba asoshi NLA-i pelaba metetdaktsü.
Dr. Aier-isa, tetenzük nungi NLF-i India sorkar aser Interlocutor, RN Ravi dang Naga yimtenren onük latettsü atema stakeholders ajak densemdaktsütsü asoshi mepishia arur, ta metetdaktsü.
“Naga yimtenren onük latettsü atema Naga yimtenren telok 6 longjemer yimjung ken o jembiba nung adenbaji terenlok tajung ka lir,” ta paisa ashi.
Tawa Hornbill benjungmong lapoktsüba mapang nung linük Tir, Ram Nath Kovind-i, kobi melii Naga yimtenren onük latettsü ta metetdaktsüogo, ta shia Speaker-i, Naga yimtenren onük latettsü atema India sorkar renema lir, ta metetdaktsü.