Naga yimten ken o renemba kidangertem dang mashi

New Delhi, Aug 6 (Agencies) : Naga yimten ken o latettsü inyakba maparen nung Nagaland den kidangersa aliba state-tem dang kecha meshii inyakbaji tim masü ta tanü Congress tir Sonia Gandhii metetdaktsüogo.
August 3 nü India sorkar o National Socialist Council of Nagalim (Isaac-Muivah) na tsüngda yimten ken o renembaji otsüsütsüsa inyaktetogo ta ato kilonser Narendra Modi-i metetdaktsü..
Tan tatar senden aliba mapang speakeri Congress tatar 25 senden nung madentsüsa agienba anema tanü Delhi nung parliament kima longkak aitba mapang osangbenertem jembidang, Naga yimten tebilemtsü latettsü asoshi jembidang Manipur, Assam aser Arunachal Pradesh state asem dangbo kecha mashi ta Sonia-isa jashia metetdaktsü.
Laisa ashiba agi, lai Nagaland den kidangersa aliba state asem chief minister den jembidang, parnok shingaia Naga yimten ken o jembiba dak aketba indang shingaia kecha mashi ta metetdaktsü.
” Iba sorkar yagi Naga yimten tebilemtsü latetsü indang jembidang, iba ken o ya nübortem rongnung benoka jembitsü aser ano kidanger Chief minister ajak shisalemsatepba sülen dang terenemli arutsü ta shia aru, ajisüaka tang ya kechi ataloker ? ta Soniaisa ashi.
Laisa ashiba agi, Naga yimten latettsü asoshi renemba ken o ji memetet, anungji onoki bilembaa meshitetter.
1997 küm nungi NSCN-IM telok o India sorkar na tsüngda yimjung lapoker tesem balala nung 80 ben tashi ajurutepa ken o jembiogo.