Naga yimten koma latettsü ?

Naga nungerji Naga nunger, India nunger masü anungji Naga nunger aser Naga nunger lushi India kübok malitsüla ta asüba temeten manguba agi tanü tashi Naga nunger kangshir. Iba temeten atema raradang India yimten tashi amshia India nunger sepaitemi Naga nungertem shirurua memeyong mezüngmeshiba, reshikangshiba aser maksüdaktsüba mapatem aika atalokogo. Naga nunger India tsüngdang yimten temeten asoshi nokdakdang Naga nunger aika taküm samaogo aser aika lemtaogo. Naga nunger akoksabaji aji tatem masü saka Naga nunger o Naga nunger na telok balaka lemsar tsükchitepdang Naga nunger taküm aika laluogo. Item tesama aser takoksa ajakji Naga yimten nüjiso asoshi taküm tenla agütsüba aser timtem tekangshia ajuruba asütsü. Item anemaji tanü mangyangtsübaji shisa maka mapa asütsü saka item tatalokbatemji mamai temulung nung yur asenoki Naga nunger o India nunger na prongla ajungtsüsa tiyong nung telemtetba kati arutertra, kin anaprongla atema tajung asütsü. Tang India sorkar o NSCN-IM na tsüngda Naga yimten tebilemtsü tatem küma latettsü asoshi jembitsü atema kechikomaka okila ken o ka nung sign sütepar ashitsü makok, saka Naga yimten nüjiso asoshi taküm tenla agütsüba aser reshikangshi, maksü aser timtem ajuruba tatalokbatem mamai telemtetba agitsü imlar. Aji oda, tang ama Naga yimten latettsü merangba mapang ka nung ya Naga nunger kin ajaki Naga nunger asoshi kechi takoktsü aser kechibo tamakoktsü, itemji asadanga temulung lapoka jembitsü nüngdaker. Küm paikaya taküm paikato lalua nüjiso bushir, tatem nung India kübok India nungersa süa alitsü lemtetra, ajibo Naga nunger aikati magizüktettsüa akok. Ano, küm paikato Naga nunger lushi ajak yimten ka kübok alitsü asoshi telemtetbasa telemtetba agia arur, tatem nung tang aliba amaisa alitsü lemtetra, ajia alima tsüngdang tamakok tuluka asütsü. Ajisüaka, ano külen, Naga nunger asoshi India nungi balaka razüka orr India senso masü saka Naga senso akümtsübaji tanü tensa tamakoktsü süra Naga nungera asütsü aser India nungera asütsü ta linükbo ka dang saka senso ayakbo balala alitsüsa lenmang bushiteptsü akok. Ano, Naga nungertemi aginüaka tanü Naga nunger lushi kidanger state balala nung aliba lushitem ya Naga yimten ka küboki aittsübaji tamakoktsü kümra, Naga nunger lushiji yimten ka küboksa masüyonga Naga nunger longjemdak yimten mesüra lokti telongjem ka alitsü asoshi bilemdangtsüa akok. Iba jagi taoba hopta nung asenoki iba osangkaket “Koma süla ?” ta asüba tasüngdangba nung ” Naga Parliament” indang ka jembiogo. Tanü tensa jungjunga bilemdangra, Naga nunger asoshi küm noklang junga yimten temeten asoshi prangpong amer raraba agibo tebilemba matongtsü amai kümogo. Ano asenok telok paikaya küma lemsar meputeptetba ya alimai temetet dang, anungji asenoki asen tashi aitba aser maitba tetsüng ajetdanga telemtetba agitsü kanga nüngdak kümogo. Tanü NSCN-IM teloki Naga yimten latettsü indang tongtibang onüktem jembidang, “Shared Sovereignty” indang jembir. Tetezü India o Naga nunger na yimten tashi lemsateptsü aser pei pei lemzükba maparen madak pei yimten tashi alitsü. Atangji, Naga nunger asoshi iba shisatsüji tasen masütsüa akok.. 16 Point Agreement mesüra India temzüng 371 (A) nung shia alibatem ajakji ” Shared Sovereignty” lir ta shitettsü, kechiyong akhidang renemba item tangatettep ken o jia India o Naga nunger na tsüngda yimten tashi lemsatepa renemba yimten ken o lir. Tamalen NSCN-IM teloki Naga yimten aser Naga lima asoshi flag tasen ka alitsü, temzüng balaka alitsü, International Border nung Defence khuret külemi asütsü ta jembiba angashiogo. Naga nunger asoshi yimten nüjisosa mesüaka item ama tongtibang maparen madak Naga nunger dak tashi ajunga amshitsüsa temeten ngutetra agizüktsüla ta bilemer. Asenok kopika yamai alitsü? Asenoka joko tangar ama sademsadema aientsüla. Aji oda, NSCN & NNC telok ajak külemi senden kanung mener telatetba kati maruyonga, parnok ajakji ka khen, ka khen ta India sorkar den pei tashi, tangatetba aser alima tensa yari Naga yimten latettsü asoshi tangatettep ken o renemtetra, Naga nunger asoshi yimten nüjiso anguba anogotemji itemji asütsü.