Naga yimtenren onük atema nükjidong ka ser inyaktsüla: CM

Kohima, December 07 (TYO): Nagaland state jenjang anguba mapang nungi tanü tashi Naga yimtenren ken o ya Nagaland nung sorkar balala aser yimtenren party ajak atema tongtibang onük ka lir, ta tanü Chief Minister, T. R Zeliang-i metetdaktsü, ta Media Cell, CMO Nagaland sangdong ka ajanga ashi.
Küm 70 tashi Naga yimtenren onük melateti aruogo aser iba onük latettsü atema Naga nunger aser India sorkar atema tang mapang ya tajungtiba lir, ta shia Chief Minister-i, Naga yimtenren onük ya ajaki agizüktettsüsa tekaraba nung latettsü asoshi ‘mangdang ka, mapa ka aser nükjidong ka’ ser inyaktsüla, ta ayongzük.
Tanü RCEMPA-Jotsoma nung Naga nunger MP tem, taoba MP tem aser MLA tem consultative senden nung jembidang Chief Minister-i, Naga yimtenren onük atema Arogotem, lokti tentettem aser melungtet telok balalai meranga inyakba atema tenüngsang agütsü.
Chief Minister-isa, 2003 küm March ita nung DAN sorkar mapang nungi Naga yimtenren onükji sorkar atema tongtibangtiba onük lir, ta ashi.
“Naga yimtenren telok balala tsüngda tangatettep kati arutsü atema meranga inyakdar aser parnok telongjemba kümdar, iba den külemi yimjung maparen tajungba akumtsü asoshi Nagaland Legislative Assembly aser tanga sabang nung bangzüng aika renema agizükogo,” ta pai metetdaktsü.
Tawa Naga yimtenren telok troki India sorkar den ken o jembi tenzükogo, ta melung chia CM-i, telok balala sabang ka nung longjemba ya Tribal Hohos, tongti lokti tentettem, Arogo, melungtet teloktem aser Naga yimtenren teloktem ajanga lir, ta tenüngsang agütsü.
Yimjung maparen tajungba akumtsü atema tamalen CM leniba nung DAN Cabinet züngsemtem Delhi-i oa liasü, ajisüaka Ato kilonser, Narendra Modi kanga mazüngi aliba ajanga majurutet, ajisüaka parnoki Union Home Minister, Rajnath Singh; Minister DONER, Jitendra Singh; National Security Advisor, Ajit Doval; Deputy NSA & Naga Peace Talks Interlocutor, R N Ravi; Secretary to PM, Bhaskar Khulbe; NNPG telok 6 aser NSCN (IM) lenir, Th. Muivah nungerbo ajuruogo, ta kasa sangdong nung shia lir.
Parnok Delhi nungi meyipa aruba sülen November 11, 2017 nü State Cabinet senden nung Ato kilonser, Modi dangi temepishiba shidi ka zülutsü lemteta liasü, iba sülen Parliamentary Working Committee (PWC) senden ka ayonga onük pongu nung bangzüng renema liasü.
Tawa linük Tir, Ram Nath Kovind-i state semdangba mapang nunga taruba state assembly election matongdang Naga yimtenren onük latettsü atema pa nem temepishiba shidi ka agütsüogo.
Iba denji kasa December 08, 2017 nü Union Home Minister, Rajnath Singh-i Kisama semdanga Hornbill benjung nung adenba mapang pa nema kasa temepishiba shidi ka agütsütsü.

You must be logged in to post a comment Login