Nagaland anghi teintet rogo aser nükpokertem ajuru

Nagaland Angh, P.B.Acharya-i Raj Bhavan, Kohima nung mulungtet teloktem den sensaksemba angur.

Kohima, August 19 (TYO) : Tanü Bodbar nü Nagaland angh P.B Acharya-i lokti tentet balala ajurua shisalemsatepogo. Item teloktem rongnung Nagaland Senior Citizens Association (NSCA), Naga Blind Association Dimapur (NBAD) aser Nerhema Students’ Union (NSU) purtem liasü.
Nagaland Senior Citizens Association (NSCA) purtem den amendang, Nagaland anghi Old Secretariat nung parnok office lapoka alibaji jungjunga yanglushitsü nangzük aser iba sülenji Chief Engineers, Housing aser Power Department purtem jar, ita ka tsüngda NSCA pur office yanglushia renemtsütsü metetdaktsü.
Angh-isa teintet rogotem dang state nung alirtem ajaki shilem agitettsüsa telok telongjem tuluba küma yanglutsü tebilemba ka shia liasü.
Iba sülen ano Nerhema Students’ Union purtem den sensaksemdang parnok yimtak yimkong metsümeshidak asem sen lakh 60 endoka Mumbai Rotary Club ajanga yanglutsütsü nangzüka liasü.
Tanüsa, Naga Blind Association Dimapur nungi parnok ketdangsertemi angh ajurua jembidang, parnok nüngdaktem ajakji state sorkar dang ashitsü aser ano paia pa tsütsü nungia teyari agütsütsü nangzük. Dimapur nung nükpokertem anidena parnok dang mapa inyak sayua anepaluba “vocational training school” ya 2001 küm tenzük. Iba school nung tetsür aser tebur atema hostel lapoka lir. Tanü parnoki angh dang iba hostel-ji yanglushitsü atema teyari meshia liasü.

You must be logged in to post a comment Login