Nagaland Assembly election atema party ajak renemshidar

Kohima, Aenjeti 18 (TYO): State assembly election atema Nagaland nung yimtenren party ajak renemba mapang ka nung tanü Election Commission of India-i state nung assembly election Tsüklai (February) 27 nü agitsü sangdongogo.
Menden 60 aliba Nagaland assembly nung tang sorkar tashi nung aliba party, Naga People’s Front (NPF) MLA 46 lir, BJP MLA 4, Independent MLA 8 aser menden ana tazüng lir.
2003 küm nungi tenzüka asembenren tashi NPF sorkar tashi nung lir, aser Chief Minister, T R Zeliang leniba nung NPF-i aniba sorkar lir.
NPF sorkar küm 15 nungi taoba mapang Chief Minister, Neiphiu Rio ya küm 11 dak tema Chief Minister inyaka liasü, ajisüaka pa Lok Sabha MP shimba sülen TR Zeliang nem iba menden agütsü. Iba sülen tetsürtem nem menden shilem 33% shiteta yutsür urban local bodies election agitsü lemtetba anema yaküm küm tetenzüklen longkak aitba sülen TR Zeliang-i CM menden toktsü, aser NPF Tir, Dr Shurhozelie Liezietsu-i ita pongu Chief Minister inyaka liasü.
NPF yimsüsüba küm 15 tatembanglen yimtenren nung mepetmesü aiben adok, ajisüaka TR Zeliang-i Dr Liezietsu madak takok ngua yaküm July ita nung tanaben CM akum.
NPF secretary general, K G Kenye-i, “Onok junga renema lir aser onoki menden ajak nungi ozü candidates toktepdaktsütsü,” ta metetdaktsüogo.
Tribal tentettem aser Naga lokti tentettemi state election magidangyongi Naga yimtenren onük latettsü atema takhangba agüjaaka election agitsü sangdongba dak sendakba nung tasüngdangba la langzüdang Kenye-i telangzüba junga magütsüi, “Naga nunger ajaki agizüktettsüsa onoki tekaraba nung Naga yimtenren ken o latetdaktsüner,” ta metetdaktsü.
Ano külen Nagaland Pradesh Congress Committee (NPCC) Tir, K Therie-i, “Election nung tokteptsü atema onok renema lir,” ta ashi. Paisa, tang aliba sorkar atsüngdoker Congress Party-i sorkar akümtsü imlar, ta ashi.
Naga nungeri election magidang Naga yimtenren ken o latettsü atema akhangba dak sendakba nung Therie-i, “Naga nunger olaji India sorkari meteta lir, ajisüaka election magidangyongi Naga yimtenren latettsü makok ta Centre-i meteta aliba yong parnoki election agitsü sentong sangdongogo,” ta ashi.
BJP Nagaland Unit Tir, Visasolie Lhoungu-ia, “Onok renema lir aser takok angutsüpur asadanga akokba tashi menden timba nung candidates toktepdaktsütsü,” ta metetdaktsü.
NPF-i BJP den tesendaktep raksaba sülen BJP-i election magidangyongi kar denbo lokteptsü asü? ta asüngdangba langzüdang Lhoungu-i, “Lokteptsü atema telemtetba agitsüji National level nung lenirtem dak dang keta lir, ajisüaka onok sasep nungbo State Unit ka ama onoki election nung party kijai toktepner,” ta metetdaktsü.
Party asem (NPF, Congress & BJP) dak alia taruba election nung Nationalist Democratic Progressive Party (NDPP), National People’s Party (NPP) aser Aam Aadmi Party party temia shilem agia tokteptsü.
NDPP ya regional yimtenren party ka lir, aser iba party nung taoba mapang sorkar ketdangsertem aika dena lir. Yashi ang taoba mapang Chief Minister aser tang temendak Lok Sabha MP, Neiphiu Rio-a NDPP nung denogo, aser pa party nungi chief minister candidate asütsü.