Nagaland Civil Service pur 1buba Badminton tournament tembangogo

Kohima, November 03 (TYO): Indoor Stadium Kohima nung November 3, 2017 anogo Nagaland Civil Service Association indang 1buba Badminton Tournament tembangogo. Iba asayamung tatembang sentong nung Khrienuo C. Metha, NCS (Retd.) special guest liasü.
Iba asayamung tatembang sentong nung jembidang, Khrienuo-i la NCS officer ka ama inyakdang ajangshibatem lemsatep aser NCS officer tem koba tesem nung lidir liaka temulung ajunga agi nüburtem tenzüktsü ajungshi. Tensa balala aser talisa tesama ajuruba mapang yimdaklirtemi NCS officer dak metaloka alir, anungji parnok khurettem temaba jenjang nung angateta anepalutsüla, ta lai ashi.
Lai-sa ILP indang tebilemtsü indang jembi aser iba dak sendakba mapa inyakdang kanga kümdanga inyaktsü ajungshi aser iba ama sentong ayongzükba ajanga ketdangsertem tsüngta tesendaktep tajungba lidaktsür, ta Association dang pelaba shisem.
1buba NCSA Badminton Tournament 2017 nung takokertem yamai alitsü: Tarep temeyoktep nung Mon district nungi Ilika Zhimomi aser Tsenthungo E. Ngullie nati temaba jenjang angu aser Dimapur district nungi Kemeiyilie aser Kelevituo Nisa nati 1st runner up jenjang angu. Iba asaya nung Dimapur district nungisa Vikhweno M. Chale aser Thejavizo Nakhro nati 2nd runner up jenjang ngutet.
Teburtem tarep nung Secretariat nungi Nokchasashi aser Vekushayi nati temaba jenjang ngutet, Mon district nungi Relise aser Tsenthungo nati 1st runner up jenjang aser Phek district nungi Benjamin Longrap aser Japeth Woch nati 2nd runner up jenjang angu.
Iba asayamung nung temeyoktep tarep aser tebur tarep nung temaba jenjang angur nem senpet sen 10,000 den kulikaket agütsü aser 1st aser 2nd runner up akoker nem senpet sen 7,000 aser 5,000 den kulikaket agütsü.
Iba sentong ya ADC Kohima, T.L Kiusumong Tikhir-i ketdang süa ani aser asayamung osang ya Nokchasashi-i agütsü. Anthony Ngully-i temeja ken ka aten aser KMC Administrator Kethosituo Sekhose-i tepela o jembi. Aser iba sentong Akunu S. Meyase-i sarasademer tembang.