Nagaland job mela ya kümshia agitsü: T R Zeliang

Dimapur, November 18 (TYO): Loktiliba atema kanga dang tongtipang mapa kaji lanurtem nem mapa inyaktsü maongka agütsüba lir kechiyong parnok ya state rongsenkettsüng aser loktiliba asoshi senti lir, ta Nagaland chief minister, T.R. Zeliang-i ashi.
Agri Expo, 4th mile Dimapur nung anogo ananü ayongzüka agiba Nagaland Career Workshop & Job Mela tatembangba anogo nung jembidang TR Zeliang-i iba onük jembi.
Nagaland nung nütsüng yongsük nung 65% ji arishi küm 18 nungi 35 tsüngda alirtem lir aser parnok ya mapa bushirtem lir. Anungji parnoki mapa angutsübaji kanga tongtipang, ta paisa shisem.
Iba tebilemtsü atema state sorkari jungjunga asadangogo aser iba ajanga employment policy ka yanglutsü atema lenmang lapoktsütsü. Ibaji lanurtem atema tajangzük ka asütsü, ta chief minister-isa metetdaktsü.
Job mela ajanga sabang tajung lapoktsür aser tim leni len tuyur. Iba sentong ajanga lanurtemi shishilembabaren nung mongin nisungtem den sensaksemtettsü aser maongka angutsü. Anungji, lanurtemi job mela nungi tajangzük agitsüla, ta paisa ashi.
T R Zeliang-isa ashiba agi, Nagaland Career Workshop & Job Mela ya kümshia agiba sentong ka kümdaktsütsü aser iba ya ajanga lanurtemi pei mangdang ataloktsü atema sabang angutsü.
Paisa tangalen nungi job mela nung adentsü atema Dimapur tashi aruba atema tenüngsang agütsü.
Tanü Nagaland chief minister-i “Aspirations and capacity mapping study” ta ser kaket ka sayatsü aser department website “nagalandskills.com” lapoktsü.
Anogo ananü sentong nung candidate 62 tashi interview agi aser parnok rongnung 43 tashi tenüng shimtetogo, ta Labour & Employment, Skill Development & Enterpreneurship Parliamentary Secretary, Dr Neiphrezo Keditsu-i metetdaktsü.

You must be logged in to post a comment Login