Nagaland nung alima lendong atalokdang IAF-i yariteptsü

Kohima, December 6 (TYO): Nagaland nung ajungben alima lendong kar danga atalokra, Eastern Air Command-i Nagaland State Disaster Management Authority (NSDMA) den yariteptsü ta metetdaktsü.
Eastern Air Command ya Indian Air Force kübok operational command 5 rongnung ka lir aser parnoki Airforce personnel aser tanga teyaritem agütsütsü.
Iba atema telok anaprongi disaster management plans, helibase aser tanga relief onüktem atema jembishinütsü, ta tanep Air Officer Commanding-in-Chief (AOC-in-C) Eastern Air Command, Air Marshal Anil Khosla-i Chief Minister TR Zeliang den ajurutepdang lemsatepa liasü.
Anil Khosla-isa TR Zeliang den Phek district kübok Pfutsero nung specialized defence radar ka yanglutsü atema tebilemba lemsatep.
Taoba mapang state sorkari Phek district nung Shillong Peak ama Airforce station ka amenoktsü atema ali alizüktsü indang temelaba agüja lir.
Shillong radar ajanga China aser Bangladesh tsütsü repranger aser iba ajanga Northeast India nung nisung mesenzütetba tesemtem nunga tsükchirtem indang tayimtsütem puteter, ta Khosla-i ashi.
Nagaland nung joint disaster management atema Airforce dena amshitsü tebilemba lemsatepba atema TR Zeliang-i kanga pelashishia agizük aser telok anaprong mener iba relief mission atema jembitsü nüngdak ta paisa shisem.
Chief Minister aser pa kinungtsü nati Anil Khosla aser pa kinungtsü na nem Naga nunger sü tabentsü aser senti osettem sempet agütsü.
Khosla aser pa kinungtsü na taonung Raj Bhavan nung yipzüktsü aser asüng Shillong-i apusoa aotsü.
Tanü nikongdang Eastern Command nungi Lt. Gen.Abhay Krishna-ia chief minister den pa indang residential office nung ajurutep.