Nagaland nung CBI !

India kübok state shia nung state police mesüra Vigilance department liaka aiben nübortemi imlaba ama parnoki ochimashi mesüra ozüng raksartem anema meinyaktetter aser tatalokbaji tejangja mebushitetter. Iba ama bushisüngdangba mapa nung tamakok anguba mesüra mapang agiba tebilemtsü aser timtemji teburshitemi dang meteta alitsü. Iba jagi nübortemsa akoksar. Anungji, aikati ochi tatalokba metetnüa CBI nem bushisüngdangdaktsüner. Atangji, state sorkar temelaba magi CBI arua state nung bushisüngdang mesütettsü, kechiyong bushisüngdangtsü nüngdakra state ket nung bushisüngdangertem peria yua lir. Ibayongji, mapa kar nung nübortemi CBI nem bushisüngdangdaktsünüra court-i aotsüba dang kechiyong state sorkari mashibo state nung CBI teben amuoktsübaji memulungtsü. Ano, aiben state nung atalokba mapatemji state sorkar mekümdangba mesüra meshitakba ajanga ataloker, anungji peii aibelenba mesüra inyaksaba mapa ka CBI nem bushisüngdangdaktsütsübaji kodanga memelatsü. Aji oda, Nagaland nung alir ajak asoshi tangtibang tangazüktsü ka asütsüsa tang atalokbaji, Phek nungi Chozuba tashi gari lenmang yanglutsü asoshi center nungi sen lakh 1578 jenjang mapa ka agütsü aser iba mapaji contractor ka tenüng agi M/S.K.K.Chire nem agütsü saka merenemtetm, anungji sen teimbaka agizüka agir mapa merenemtetbaji CBI -i bushisüngdangtsüla ta Gauhati High Court nung nisung ka tenüng agi Thuputhiyi Venuh-i ‘Public Interest Litigation (PIL)” ka agütsü. Pai ashiba agi, iba lenmang yanglutsü asoshi mapa angusang K.K.Chire-ji taoba Nagaland minister, Kuzholuzo Nienu adianu liasü. Anungji, ministerbaji dena parnok longjemer lenmang inyaktsü center nungi yokba sen teimbaka agizüka agir lenmang merenemteti toktsü ta PIL agütsüsang Thuputhiyi Venuhi obendangertem dang metetdakja liasü. Item ken o ji jungjunga angadanger Gauhati High court nung obendangertemi Nagaland nung center nungi yokba sen agir mapa meinyakba toktsüba maparenji CBI-i bushisüngdangtsü asoshi yakanü obendang agütsüogo. Iba obendangba nung obendangertemi CBI dang iba ken o ya jungjunga tekaratiba nung bushisüngdanger ita tuku tsüngda nung parnoki bushitetba osangji agütsütsüla ta metetdaktsüogo. PIL ya nübortem asoshi ochi kaktettsü asoshi pei lima meimba senso kati inyaktsüba tashi ka lir. Tang amaji nisung kari nübortem asoshi senotsübo arur ser nung junga mamshiba ngura mesüra nübortem asoshi inyaktsütsü sentong aika lir ser nung meinyakba ajitetra obendangdak iba ken o ji benoka jembidaktsütsüla. Atangji, RTI ajanga office mesüra ketdangsertem ket nungi asenoki metetnüba osangtem angutsü saka aibelena inyakba asoshibo memerenshitettsü. Ajisüaka, kodang senso kati RTI ajanga temetetnüba osang agizüker külen item osangtemji kuli kümer okadak PIL kümer agütsüra, sorkari idangjisa tim teinyaktsü inyaktsü. Atangji, senso kati PIL agütsütsü akok saka iba jagi pei ajangzüktsüsabo kecha malitsüla. Aji oda, senso kati pei ajangzüktsü kecha mebilemi nübortem ajangzükdaktsütsü asoshi okadak ken o benokba dang PIL ta ajar. Tanü asen alidak sorkari meinyaktsüba mapa aika lir, ano mapa karbo sorkaribo senotsü agütsü ser nung melapok mesüra meinyak ser tiyazü terenemba kuli agütsür sen ajak agizüka agiba otsütema lir. Joko, High court ajanga ita tuku tsüngda bushisüngdangba osang agüjang ta ozüng aguja alinungji, CBI teloki Phek nungi Chozuba tashi gari lenmang yangluba mapaji tong oagi reprangdanger bushisüngdang mapa tenzüktsü imlar. Iba amaji asen state nunga sensosangertemi PIL ajanga yimten yimsüsür aser ketdangser tulurtemi nübortem memeimi inyakba mapatem CBI nem bushisüngdaktsütsüsa inyakra, iba jagiang Naga lima nung ochimashi aser tashiyim agi inyaktsü arendaktsü aser lanurtem asoshi putu tasen ka merüktetter asütsü.