Nagaland nung election timi agitsü imlar: ECI

Kohima, Tsüklai (Feb) 15 (TYO): Election Commission of India (ECI)-i Nagaland nung State level aser District level nung Election ketdangsertem dang, state election timi tajungtiba nung agitettsü atema kecha metsübui shinga tetuyuba kübok meinyaktsü saka ochishia inyaktsü metetdaktsü.
Tanü Kohima nung osangbenertem den jembidang Chief Election Commissioner, O P Rawat-i, Election Commission-i election merüka agitsü aser timi tajungtiba nung agitsü nükjidong aliba dak sendakba nung item tetuyuba agutsür, ta metetdaktsü.
Rawat leniba nung züngsem teneti akumba ECI team-i yashi nungi Nagaland nung election atema terenemshiba asadangdar.
Rawat-i, yaküm Yimpoksüi (November) ita nung pai mezüng state semdangba mapang dang nungi tang tajungba, ajisüaka Naga traibal tentettemi ‘solution before election’ akhangba ajanga tensa tera raksa, ajisüaka District Election ketdangsertem aser election machineries den jembiba ajanga election inyakyim nung terenlok ajiteta Commission melung süogo, ta metetdaktsü.
Rawat-isa, Commission-i yimtenren party balala nungi züngsemtem ajurua parnok onüktem angadangogo aser election tesünep nung junga agitettsü atema jembiogo, ta ashi.
Yimtenren party tem nungi züngsemtemi, Election Commission-i yokba Observer tem jagi kanga yakyaka inyakba den külemi ken o agutsüba atema tim teinyaktsü inyakdaktsüner ta mepishiogo, ta paisa metetdaktsü.
Pai ashiba agi, yimtenren party temisa party tem, candidate tem aser voters ajangzüktsü atema EC dang election dak sendakba telatetbatem peipei oshi nung meyipzüka adoktsü atema mepishiogo.
Tzüzüng-ozüng tensa dak sendakba nung pai, yimtenren party temi constituency kar nungbo peipei candidates nem security peria agutsütsü mepishiogo; election dak sendakba rara nokdangtsü, aser voter tem amokmerentsü merangba nokdangtsü atema prangpong amer senzürtem nokdangtsü mepishiogo, ta metetdaktsü.
Ano tesem kar nungbo village council-i voter tem madak tashi amshitsü merangba nokdangtsü atema mepishi, ta ECI-isa metetdaktsü.
Rawat-i, tensa azüoktsü atema tapet mera balala agia inyaktsü asoshi State administration aser police dang metetdaktsüogo, ta shisem.
Election timi agitettsü atema prangpong amer senzüba nokdangtsü asoshi Commission-i ceasefire ground rules benshitsü atema metetdaktsüogo, iba den külemi Myanmar den International arrtsülen yakyaka anüktsü atema Assam Rifes nem tetuyuba agutsüogo, ta paisa metetdaktsü.
Ano election agiba piyong state nung aliba police check posts ajakji tanen makai webcasting aser videography ajanga ayimjemtsü, ta paisa metetdaktsü.
State nung voters 11,91,513 nungi tebur 6,01,707 (50.50 %) aser tetsür 5,89,806 (49.50 %) lir, aser servive voters 5925 lir, ta pai metetdaktsü.
Polling station 2156 nung vote agütsütsü, kechyiong Northern Angami-II kübok polling station 40 lir, aser iba menden atemabo tetokteper mali takoker sangdongogo; Polling staion ajak nung EVM den VVPATs amshitsü, ta paisa metetdaktsü.
Tan election nung Information Technology applications tasen pongu amshir, aser itemji- SAMADHAN – Public Grievance Redressal & Monitoring System, SUVIDHA – Single Window Permission System, SUGAM – Vehicle Management System, ELECTION-ATLAS for 60-Assembly Constituencies aser Webcasting, Videography & Micro Observers lir, ta EC-isa metetdaktsü.