Nagaland nung gari lenmangtem tajungba akümtsü: TR Zeliang

Dimapur, Aenjeti (January) 17 (TYO: Nagaland nung gari lenmangtem jungjunga anepalua ayutsü atema sorkari Nagaland Road Maintenance Policy 2017 tenzük ta chief minister T.R. Zeliang-i ashi.
Dimapur nung gari lenmangtem tajungba kümdaktsütsü atema Rasemnü (Bodbar) TR Zeliang-i mapatong ana tenzüktsü.
Lenmangtemji National Highway-39 nung shilem ka lir aser iba nung New Field Check Gate nungi Zion Hospital tashi Two- lane (4.4 kms) aser Zion Hospital nungi Chumukedima tashi 4- lane (12.90 kms) yanglutsüba lir.
Road Maintenance Policy tasen tenzükba aser senotsü lemzükja aliba ajanga lenmangtem tiptema yutettsü ta sorkari bilemer, ta tanü Chief minister-i ashi.
Tanü pai Purana bazaar Dimapur nung national highway project atema lung azünga yutsü.
Centre-i kanga dang mulungsoa gari lenmang anepalutsü atema sen lemzüktsüogo. Centre-i agütsü nung dang state sorkari mapang shia gari lenmangtem anepaluteter kechiyong road maintenance work atema sen lemzüka ayutsübaji kanga tasak, ta TR Zeliang-i metetdaktsü.
Dimapur aser temeket nung apu chirepa alibatem tekaraba nung yanglutsü atema sorkari mapa inyaker. Apu yangluba mapa tenzükogo anungji nisung ajaki mapatongtem nung yariteptsü mepishir, ta paisa shisem.
Ministry of Road Transport & Highways (MoRTH)-i item project inyaktsü atema sen lemzüktsüba atema kanga pelar. Item mapa tembanga inyakba ajanga state yimtiba den tesentaktep tajungba akümba dang masü saka Dimapur nung alirtema anisüngzüktsü, ta chief minister-isa ashi.
2000-2001 nung sorkari Dimapur-Chumukedima lenmang ulushiba aser yanglushiba mapa tenzük. Ajisüaka, ali kiburtemi ashishitepba ajanga iba mapa anendaka ayu. Iba sülen Karbi-Anglong nung aliba NH-36 nungi Rangapahar Army cantonment adena 7th Mile tashi len lenmang ka yanglutsü sentong atong saka ibajia meinyaktet, ta TR Zeliang-i tanü o jembidang ashi.
Tanü Khatkati/ Lahorijan (Assam) nungi Patkai Area via Showuba-Niuland-Seithekiema tashi permanent by-pass ka yangluba ya asenok atema kanga dang tia taka. Asenoki aginüba ama Dimapur nungi Kohima tashi 4 lane highway kobi melii asangsang nung ataloktsü. Ajisüaka, iba mapa atema ali peria nüngdaker aser nübortemi amalitepa inyaktsüla, ta paisa shisem.
Iba sentong nung National Highways Minister Y. Vikheho Swu-ia o jembi aser DABA, Pastor Rev. Maong Lemtur-i meshiteta sarasademtsü.
Tanü Minister, Adviser, Parliamentary Secretary aser MLA aikati Chief Minister TR Zeliang meiner aru.