Nagaland nung media nisungtem arangshi

Hotel Saramati, Dimpaur nung Nagaland Press Association (NPA) tir K. Temjen Jamir-i Scroll.in nung Deputy Editor, Nitin Sethi pelaa agizükba mapang Naga nunger sü ka abenloktsüdang agiba noksa angur.
Hotel Saramati, Dimpaur nung Nagaland Press Association (NPA) tir K. Temjen Jamir-i Scroll.in nung Deputy Editor, Nitin Sethi pelaa agizükba mapang Naga nunger sü ka abenloktsüdang agiba noksa angur.

Dimapur, November 14 (TYO): November 13 aser 14 anogotem Hotel Saramati, Dimapur nung Nagaland nung media dak sendakba nisungtem atema sentong tajung ka ayongzüka agiogo.
Iba sentong ya ochimashi aser elections indang osang sangdongba nung ajemdaker agi aser shisalen sayurji Scroll.in nung Deputy Editor, Nitin Sethi liasü.
Anogo ananü media workshop ji Nagaland Press Association (NPA)-i Directorate of Information and Public Relations (DIPR), Government of Nagaland den yaritepa ayongzük.
Nitin Sethi ya media nung aika ajangshia aruba nisung ka lir aser pai shisalen aika sayuba den külemi RTI amshiyim, documents aser affidavits nung ajemdaker osang adokba, tenüng menüktsüba ken o, yimozüluba yimya aser osangkaket tereprangtsü yangluba indang onüktem lemsatep.
Nitin Sethi ya mezüng Down to Earth ta ser science & environment osangkaket ka nung Senior Assistant Editor ama inyaka journalism nung tetsüng ajemok. Iba sülen pai Times of India, The Hindu, Business Standard nung inyaka arur tang pa Scroll.in nung teinyakdak lir.
Nitin ya journalism nungdang masü saka tang mapatem inyaker aser pai inyakba mapa tongtitem rongnung Indian Institute of Mass Communication, New Delhi nung Guest Faculty aser Ashoka University nung Guest Lecturer inyaker.
Anogo ananü media workshop nung Kohima Press Club aser Dimapur Press Club nungi tirtemi anir züngsemtem den yimozülurtem aser publisher tem aden. Sentong nungsa DPRO Dimapur den lar staff temia shilem agi.
Tanü workshop tembangba sentong nung DIPR Director, Limawati Ao tetushi süa jaoker ama aden aser pai tadener ajak nem kulikaket kaka lema agütsü.

You must be logged in to post a comment Login