Nagaland nung political party temi kanga meranga nübo yimteper

Kohima, Tsüklai 18 (TYO): Nagaland nung election agitsü anogo 9 dang anünga lia political party ajaki nübortem mesüzüktsü meranga election nüboyimba sentongtem agia arudar.
Taoba election tem ama masü takümbo candidate temi poster campaign balaka meinyaker. Ajisüaka, technology ainba den tsüngkang medema political party temi banner campaign kanga bulua inyakteper.
Talisa, tesem aika nung kin hoho aser civil society temi rarabangsen madokdaktsütsü atema political party indang youth camp tem mesemtettsü memelar.
Assembly menden 59 nung amentsü atema candidate ajak agi parnok 195 lir. Parnok rongnung NPF nungi 58, Congress nungi 18, BJP nungi 20, NDPP nungi 39, NPP nungi 25, JDU nungi 13, NCP nungi 6, AAP nungi 3, LJP nungi 2 aser Independent 11 lir.
11-Northern Angami-II nungi NDPP chief ministerial candidate Neiphiu Rio-i tetokteper shinga melii takok nguogo.
Taruba election ya NPF aser NDPP-BJP teloktep tsüngda tetoktepba ka ama lir.
13 buba NLA election nung tetsür candidate 5 lir aser Nagaland nung election agia arubatem nung tetsür candidate teimbai toktepbaji tang ya asütsü.
Taküm election nung inyakyim tasen ka tenzükbaji ‘common platform’ sentong ayonga agiba lir aser iba sentong ya Village Council aser Ward Panchayat temi anir lokti tentettemi ayonga agia arudar.
Nagaland Baptist Church Council (NBCC)-i clean election indang maparen inyaka arur aser parnoki nübortem dang vote yoka machitsü aser lennir tajungtem shimtsü tayongzükba agütsür.
NBCC-isa candidate aser political party tem dang vote agütsürtem süpokrem amshia memesüzüktsü atema ayongzüker.
Nagaland assembly election nung sen aser ozüng alema shibelenbatem mittsü aser noktangtsü atema Election office-i tesem balala nung flying squad aser static surveillance team tem mapa lemzüktsüogo.
“Tang tashi nung sen lakh 50 aser yi litre 40000 den ozüng alema shibelenba mozütem puogo,” ta CEO Nagaland Abhijit Sinha-i metetdaktsü.
Tsüklai 27, 2018 atongtsü atema tatembangba hopta tsüngda National political party temi Central lennirtem anir arua nüboyimba sentongtem nung shilem agidaktsütsü sentong lir.
BJP-i Tuensang district-i Prime Minister Narendra Modi, Zunheboto district-i Union Home Minister Rajnath Singh aser Wokha district-i BJP National president Amit Shah nungertem anir arutsü sentong lir.
Maneni Congress tir Rahul Gandhi aser tanga AICC ketdangpurtem Congress atema nüboyimtsütsü aser JD (U)-ia Bihar Chief Minister Nitish Kumar anir arutsü atema mapa inyaker ta osang angazüker.

You must be logged in to post a comment Login