Nagaland nung tanurtem kümzüka ayutsü tenangzükba agi

Parliamentary Secretary Merentoshi-i Highland Park, Kohima nung World Day for Prevention of Child Abuse sentong nung o jembiba noksa nung angur. 

Kohima, November 19 (TYO): Tanü Nagaland nung World Day for Prevention of Child Abuse mungogo aser iba mapang tanurtem kümzüka ayutsü tenangzükba agi.
Iba anogomung ya State Child Protection Society Nagaland aser Social Welfare Department nati ayongzük.
Sentong nung tongti tesemdangerji Social Welfare Parliamentary Secretary, Merentoshi R. Jamir liasü aser pai o jembidang Naga loktiliba nung tanurtem dak tashiyim mapa inyakba aliba atema temulung shiranga bilemba metetdaktsü.
Naga loktiliba nungi tanurtem dak tashiyim mapa inyakba agientsü atema sorkar aser shelter homes lapoka alirtem dena nisung ajaki yariteptsüla. Asenoki tashiyim mapa inyakba aser tashi angatsü atema azüokba na tsüngda tebendang metettsüla. Tanur ka tashi angatsü azüokba tenüng nung tashiyim mapa inyabaji magizüker, ta Merentoshi-i ashi.
Parliamentary Secretary-i orphanage aser children home nung director aser kiburtem dang Nagaland nung tanur dak tashiyim mapa inyakba anendaktsütsü atema tebilembatem lemsateptsü ayongzük.
Merentoshi-isa, department ketdangsertem dang Nagaland nung village council shia dang tanur kümzük ayutsü indang osang sangoktsütsü atema sentong ka tenzüktsü tetuyuba agütsü.
Tanü agiba sentong nung Nagaland Commission for Protection of Child Rights (NCPCR) chairperson Meilemla Pongener-ia o jembidang, “tanurtem dak tashiyim mapa inyakba anema noktakba aser osang prokshiba nung asenok ajaki pusema nungitdi” ta ayongzük.
Linük atema senti rongsenji tanurtem lir aser parnok timi anitetra, state aser linük nung parnok senso tajung ka ka akümtsü. Anungji tanurtemi timi anitettsübaji kanga dang tongtipang, ta laisa ashi.
Prodigal’s Home Dimapur, director K. Ela-ia Nagaland nung tanurtem dak tashiyim mapa inyakba osang lemsatepdang, tanurtem dak tashiyim mapa inyakbaji yimdong nung dang masü saka kidang, kiyong, school, hostel aser tanurtem kümzüka ayutsü tesemtem nunga ataloker, ta metetdaktsü.
Nagaland state nung Juvenile Justice Act mapa shitak meinyaker, anungji iba Act ya chichiba tangatetba nung amshitsüla. Talisa school shia nung child protection policy alitsü aser Arogotem nunga Sunday school nung tanur kümzüka ayutsü indang onük jembitsüla, ta Ela-isa ayongzük.
Iba sentong nung Social Welfare Department Secretary O.T. Chingmak Chang aser SCPS-N Additional Secretary & Director Z. Nyusietho Nyuthe natia o jembi.
Sentong nungsa Kohima Orphanage & Destitute Home, Bright Morning Star aser Open Shelter nungi tanurtemia shilem balala agi.