NAGALAND nungbo RTI Act ajanga tajangzük kangabo mangur ama bilemer

~ T. Nukshi Yaden, Tuli.

Right to information Act (RTI), aseni metetnüba metettsü temeten. Iba temzüng ya 2005 küm nungi centre sonkari yanglua linük ajunga nung senso ajaki iba Act amshia inyakyim balala ajak indang aseni metetnüba Department balala nungi asüngdangyatsü senso ajak nem temeten agüja lir. Aji oda, senso aikati yamaji iba act amshia inyaktepba angur, aser angashir. Saka tanü tashi nung item asüngdangya putetba ajanga department mesüra nisung kar okadaki aoba indangbo kecha mangashir, Tawa tanü osang kaket ajanga PIO ana parnoki telangzütsü tim magutsüba ajang senchi achiba osang angashiogo. Ano ACAUT-i RTI ajanga ngutetba social Welfare Department aser RD ano State Council of Education Research-tem nung ‘backdoor appointments’ indang sangdongogo. Iba dak alaka oda niang memeteti alitsüa akok saka iba RTI act amshia inyaktetba aikabo mangur. Koba department nungi südir süaka aseni metetnüba metetba sülenji kechi inyaktsüla ajia mapa küma inyaker asü meinyaker aser aji koda tempanger ajia sangdongtsüla. Mesüra koba tangatetba aser taginüba nung iba act amshia asüngdangyar ajia metetsü kanga tongtipang ama angateter . Iba RTI Act ya asenok asoshi Nok, Nü (Hadir) tajung ka asen nüngdak nung amshitsü amouktsüba ama lir. Sura iba ya asen nija (Personal) tajangzük asoshi amshir asü mesüra nübur, loktiliba tajangzük asoshi amshirar iba ya bilemdangtsü onük ka ama angateter.
Senso ajak nem iba Act amshia inyaktsü temeten agüja lir, saka ajakibo aji oda meinyaktetter aser bilemaka, iba RTI Act indang tangatetba peria maliba ajanga odang doktsür. Saka nüburtem rongnung joko karbo, tongtipangsa zünger mapa mangu lanurtem aika iba mapa ya par wadang küma peisasa RTI Activist kümer pa mesüra la atema nok, nü tajung ka ama kümer mapang ajak iba mapa nung indoka inyaker lir aser item rongnung karibo RTI. Activist tenüng nung National award tapu balala anguba angazüker, sura item activist-temi inyakba ajanga tanü tashi ken o mapa karbo mapa küma aoer asü maor, aji kanga tongtipang ama bilemer. Iba hadir RTI Act ya bener department balala amokmerena pa mesüra la kija tajangzük asoshi, ano department mesüra officer karbo par department mesüra pa aibelen nembanga ayutsü asoshi item Activist tem denji ajurutepba angateteptsü (Negotiate) inyaktepba lira ajibo aibelen onsara asütsü aser nübor ashiokja ashikülak mapa inyaker asütsü.
Aji oda, item ama yimya inyakyim lira asen lima nungbo iba RTI. Act ajanga tajangzük kecha mangutsü. Tanga state-tem kar nungbo ano RTI Activist taküm samatsüba osang angashir. Aji oda item activitist-temjia parnoki ochi nung tasü itta inyaktetra ano parnok takümjia lendong nung lir, shidakba inyaker asoshibo sorkar nungi security tashi agütsütsüsa akümtsü amai angateter. Ano shibai metet, activist karbo oda pai pasasa tangatetba agi masü, saka nisung kar oda politicians aser Bureaucrats mesüra Technocrats aser business nisungtemi parnok nüngdak asoshi instrument ka ama pa mesüra laji amshia alitsüa akok. Aser parnok nungi pa mesüra la (Activist) jia parnok nüngdak nung amshiba yari taa ngua alitsüa akok. Anungji shirnoki iba RTI Act amshia pa mesüra la Activists ka ama inyaker parnoki nübur tajangzük asoshi tangatetba nung inyaktsüla, aser nüburtemia parnoki inyakba nung nungittsüla aser yamaji parnokia inyaktetbatem nubortem nem metetdaktsütsüla. Aji oda, asenok ajak ajangzüktsü asoshi asenok ajak shilem lir ta tangatetba alitsüla. Mesüra ano RTI Activists-bo ali saka inyaktetba kecha mangur ta süra, ano parnoki activitist-tem inyakyim metetsü asoshi RTI amshia metetsü lenmang karbo alinungang shidak ama bilemer. Ajita mesüra iba (hadir) nok, nü bener pa o kisüng tajangzük asoshi inyaker kümra parnok ajungba ashi nübortem asoshibo amajok asütsü.
Aji oda, pei nüngdak yari nisung kari pei metetnüba metetsü asoshi iba Act amshia pa mesüra la nüngdakba ataloka inyakbajia tim dang, saka Activist küma pa wadang ka ama inyakertemi inyakba nungji koma koda temb anger ta asübaji metetsü asoshi ano asenok senso kari kasa onük nungji iba RTI Act amshia asüngdangya asünungbo parnok Activist- tem jagia parnoksasa kümdanga ochi nung inyaktsü aser yamaji inyaktepba ajanga asenok nüburtem tajangzük angut, Anungji, shirnok iba RTI activist ka ama pei wadang küma inyaker parnoki ochi tangatetba nung tanüla temerük agi asen lima loktiliba nung temelenshi tulu ka bener arutsüsa inyakangni ta teimla tuli nung atar.

You must be logged in to post a comment Login