Nagaland State Cooperative Bank Limited lokti senden menogo

Dimapur, Aenjeti 19 (TYO): Nagaland State Cooperative Bank (NSCB) Limited indang 48buba lokti senden Rogonü Dimapur nung aliba NSCB Conference Hall nung kaogo.
Iba senden nung jembiba mapang, NSCB indang Board of Director, LN Ngullie-i NSCB nung ketdangsertem aser iba nung sendaka alirtem dang, senotsü tsütsü linük nung temelenshi aruba ama NSCB nungi bendenba agi iba reju peritsü asoshi bendanga agütsüshir inyaktsü ajungshi.
Metsüremi 31, 2017 nung iba bank indang terenlok shilem 18.70 liasü aser Metsüremi 31, 2016 nungbo terenlok ya 10.78 dang liasü, ta pai ashi. Metsüremi 31, 2017 nung tajangzük sen lakh 837.14 liasü aser iba tajangzük ya taoba financial year nung sen lakh 215.19 aliba dang nungi pezüsü agi timba lir, ta pai-sa shisem. Iba ajanga Metsüremi 31, 2016 nung bank takoksa sen lakh 3738.14 aliba nungi Metsüremi 31, 2017 nung tajemba küma takoksa sen lakh 2901 dang liasü, ta ketdangseri ashi.
Linük nung Non Performing Assets (NPAs) ya banking sector ajunga asoshi tebilemtsü tulutiba lir. Sen aputsür meyiba manguba ya tebilemtsü tulu kümogo aser iba maparen shidak meinyakteter. Loan tanaben meyiba meshitsü asoshi head office shia bank-i Loan Monitoring Committee amenokogo. Iba ajanga sen aputsüba meyiba meshiba aser NPA management nung terenlok lir, ta LN Ngullie-i shisem.
Management ajangasa customer aser nüburtemi maneni bank den yaritepba asoshi pelaba lemsatep.
Iba senden nung Directors 2016-17 audit osang, Auditor osang, 31/3/2017 küm tatem atema account indang Auditor statemen, 2016-17 aser 2017-18 atema revised budget aser bank indang amendment of bye laws osangtem agizüka ayu.
Iba sülen kasa senden nung DAP, CASA aser NPAs kübok mapa tajungtiba inyaker bank branch tem nem sempet agütsü.