Nagaland State Messiahji shiba asütsü ?

~  M. Meren Ex.Pastor.

Küm noklang aika lia Tsüngremi ainketer ajanga Yihuda nunger dangi TEKÜMZÜKER ka yoktsü ta maneni jembia aru. Anungji Yihuda nungeri iba Tekümzüker Messiah ji anüng nungi kin ajaki ngua sentsüwangshi tulu nung arutsü südi ta bilem. Aser Missiah ji arudang kin ajungai aser chubatem ajungai Pa tsüngdang apudaktsü aser Paji Yirusalem Chuba menden nung amentsü ta amanga chuba ki yanglushia, chuba menden yanglushia renema ata liasü.
Aser kodang Paji arudir Putirtem, tulurtem menden tajung atatsütsü ta imlaseta ataa liasü, saka Yihuda nunger putir aser tezülurtemi bilemba ama matalok, parnoki anüng nungi sentsüwangshia arutsü aser parnok temaba menden nung alirtem bushitsü ta bilema anünglen repranga ata alidang khenyongi meimlaba kinük ka kong Bethlehem yimti tila tezülen Nashi ki tila ka nungang Messiah ji aso.
Tsüngremi Yihuda nunger tekümzüker ka yoktsü nangzükba Messiah jagi Farici, Tezulur aser Saduki tem den memetemtet, kechiaser parnokji ANUNGLEN repranger telok saka Messiah ji tilar aser Lajar den sensakertem tembar dang liasü, aser Messiah ji alima teraksa, temolungjang teraksa aser tejentokbapurtem nem teimla agütsütsü aru saka shirnoki alilen maremzüker aser pei ajungtsü pei olutsü asoshi dang bilemer parnok metongshitsütsü asoshi Pa aru.
Messiah ji tain aküm aser Farisi Saduki aser Tezülurtem shirnoki sensaker sempa, shirnoki timtemertem dang aria mebilem, shirnoki pei nübur meyong rongsen makzüka agir parnok anema anogo shia ayimtentsü tenzük aser tayimtenba nükjidongji AIATAI ji liasü. Alima nung ayatai dak alaka tamajungbabo kecha maka, anungji Messiah jagi parnok dang kechi atema Aiatai ashiar reprangdi.
1. Farisi Saduki aser Tezülurtemji O agibo tang inyaktettsü ama jembir saka mapabo maka anungji nenok Aiatai ta ashi.
2. Farisi Saduki aser Tezülurtem jagi tangar nembo khu taret benloktsür saka parnoki pei temyong agia khu dakji mekongshir anungji nenok Aiatai ta ashi.
3. Farisi Saduki aser Tezülurtemji taoba ajaklen salem & tetushi aginer oda nisung ajak nem Saab ta jadaktsüner aser lokti nung menden temaba nung dang amentsü rakteper anungji nenok Aiatai ta ashi.
4. Farisi Saduki aser Tezülurtemji Anemsüpur temeja anungji nenok Aiatai ta ashi.
5. Farisi Saduki aser Tezülurtem nenoki Amitsür kibo meyoker, tetezü tilartem, sensakertem meyong ajak chimatsür saka tangari angudangbo talanglang sarasademer anungji nenok tai tuluba angutsü ta ashi.
6. Farisi Saduki aser Tezülurtem, nenoki alima ajak sema senzüa nübur ajakji Yihuda nunger kümdaktsütsü meranger, outreach mapa Mission mapabo tululu inyaker ama oda nütsüng ajakji pa asemertem, par nütsüng kümdaktsütsü ochi mashi agi raseter anungji parnok ajakji nenoki molumi chirtem kümdaktsür anungji nenok Aiatai ta ashir.
7. Farisi Saduki aser Tezülur Anemsübatem Aiatai, kechiaser nenoki Kotak lenmang shibangtsür, aser nenoka Kotak lenmang jagi mair ta ashi.
8. Farisi Saduki aser Tezülurtemji nükpokertem lir, kechiaser nenoki shitakbaji majiteter anungji nenok Aiatai ta ashi.(Kechiaser Naga nunger nütsüng nübur ajunga asatenba, timatemba aser okrongba mangur)
9. Saduki Farisi aser Tezülurtem Aiatai, kechiaser nenoki Napa, Tzüma mersü tilala aser anmenemtsü tilatari nung ter shilem abener saka Yimobo senzüker, tila-tari nungbo tenla bilemteter saka ütbo meyoker, tetezü Ut koda tulu yamaji sen tululu anguba nungbo ter shilem mabener anungji nenok Aiatai ta ashi.
10. Farisi Saduki aser Tezülurtem nenoki Marok aser Ausu tema shitoker saka telonglenbo Ampangyim aser yi agimesepba agi sünga lir anungji nenok Aiatai ta ashi. (Tema nung nütsüng nübur tsüngdangbo tesüngmangtsü o tajung jembia sayur saka telunglen pei agitsü agi amena sobua lir)
11. Farisi Saduki aser Tezülurtemji Anemsüba purtem lir, kechiaser nenok Leper temesüng mesük, kechiaser Leper tema koda tebor ajung saka telunglenbo tasüba teshinem aser teret agi sünga lir. Kechiaser nenok nisung madang Temeshi saka telunglen Anemsü aser ozüng raksaba agi sünga lir anungji nenok Aiatai ta ashi.
12. Farisi Saduki aser Tezülurtemji Anemsüpurtem lir, kechiaser nenoki Ainkar aser Temeshipurtem Leper yanglushir aser ibai kübu nungeri tepsetba saka onokibo yamajibo meinyakla ta sasaseta jembir, anungji iba jagi nenokji Ainketer aser Temeshipur tepseter chirtem ta sayur .Anungji nenok Aiatai ta ashi.
Asenoki Naga lima tasen ka küma yanglutsü asoshi kechi party ka arutsü? Shiba Chief Minister asütsü? ta tenük ajak rangpoka repranga atar. Naga nunger asoshi tarutsü aliba MESSIAH ji shiba asütsü? T.R.Zeliang asü? Dr.Shurhozelie asü? mesüra Rio asütsü? Saka par asemji shiba südir süaka Chief Minister menden nung mendakjang saka ashiko Naga nungeri imlaba Messiah ama masü saka Shirong nem shi tsükang azüktsü ama Naga nunger meyong ajak chimatsür oadokra asenokbo aiatai asütsü.
Tanü Nagaland nung osangkaket ajunga nung tayimtenba olaji Chief Minister-i anir Minister aser MLA ajak OCHIMASHI agi sünga lir ta ayimtener. Nagaland State yangluteter yimsü süyonga aruba joko küm 54 jungogo aser aji nisung asü nunga kanga tashikadang lir, mapa ajak jeta inyakba mapang lir, kibong sentong ajak takok ngua bener aoba mapang lir, pei ki tajung yangertetdang lir, yamaji Nagaland State jia tang tajungdang, lenmang ajak sentsü adoka yangluteter alitsüba mapang, Govt. Departmental ajak jungjunga amenteter alitsüba mapang, Educational Institutes tajung agi Naga lima sünga yangerteter alitsüba mapang, saka Govt. School bo tazüngla timba. Tanü State küm 54 ajungba mapang nungjibo State yimden menden nung amenertemjibo takutet nisungtem, Centre den akutepba jembitettsüpurtem alitsüba, saka Centre-i tao majung o ana katepba mejembiteter timba, MLA ta ajatsüsabo kata mali saka Cabinet timba, meketa aliba State temi reprangzüktsüsa alimaji yangerteter alitsü mapang saka otsüla-obula nunger aliba putu mapang den saku, kechiaser joko State ya tain kümogo, saka State Sorkar menden lateter inyaka aruba rongnung tang aliba State Minister tem tamajungtiba mapang ta osangkaket nung adokpet adokdang tawa Tiryimyim adok ka nung Minister Imkong Imchen-i pai o tajung aika agi langzüa lir saka pai tongtibang o ka ashibaji Onok ajakbo tamajung masü, saka karbo tajunga lir, ta ashiba angur. Anungji iba jagi sayur tanü nokdaka aliba State yimsüsürtemji Ochimashi temejaa ta ashibaji peisasa hau ta langzüba den saku lir.
Tanü Mungdang aser Arogotemi Clean Election tesüngmangtsü sashia ayongzüker aser ibaji Naga lima tasen ka yanglunüba ajanga lir, kechiaser yashi tashi Election inyakim mapaji mojing mapa ama ajanga aruogo aser tanü nokdaka aliba yimsüsürtemji sen aser tashiyim agi adokbapurtem ta meteta lir aser sen dang lira aluyimer katia MLA tokteptettsü aser sen dang lira paji atoktsü, anungji tang tarutsü aliba Election yabo taoba inyakyim ama inyaktet nungbo Naga lima ya kechi akümtsü ta Nagalima meimertemi asadanger Naga lima tasen ka yanglutsü nükjidong nung shibai yimsü tajungba Ochi agi sütettsü? Shibai nübur tila tulu kasa meima yaritettsü? Shibai Naga lima yanglutsü? Shibai Naga nübur Alar tia nungi anitettsü? Shibai nübur meyong sen mima maoyatsü? Shibai Centre Sorkar tonga oa akotepba jembiteta Naga nübur asoshi shitettsü? Ibala candidate ji dang yaritsü asoshi nüburtem nem Freedom agüjang ta Mungdang aser Arogotemi ayimtener.
Aser tanü nüburtemia ya angatetdi, nai yariba Candidate jagi Naga yimden nung koda yaritettsü? Assembly nung pai koda jembitettsü? Aseni yariba Candidate ji tarutsü mangdang tajung akaba nisung asü masü? Ibaji jungjunga asadanger kimang adianu ta masü, pur tajung ta masü, pai sen timba agütsür ta masü, pai dang ozü nem post ka temporary nung dang asuyonga agütsüji ta masü, saka Naga lima anitettsü asü masü ta asadanger asen Vote ji chioktsüla, iba tangatetbaji asen dak melira itsük melen isü dangsa asütsü.
Mungdang aser Arogotemia taoba mapang koba Dry State asoshi tesüngmangtsü meranga takok ngutet saka tanü kechi tia nung lir? Anungji Mungdang aser Arogotem tanü tamakok tulutiba nung lir, aser alimai asenok menütsür, anungji iba tia jagi maitsüsa tatem tonga Clean Election ji meranga takok angutsü sentong yanglutsüla. Saka tanü shirnok yoka dak amen ama longshishidar, tanü ka nung, asüng ka nung ta jokshishidarji item jagi sen crore sa crore Election atema nangtena akabaji kodang chiokdir asenok nütsüng nüburtem aji raktepdang Clean Election ji tejangtep kata maka samatsü ta ajiteter.
Saka shidakba Naga nunger Messiah ji shiba asütsü? Farisi Saduki aser tezülurtem amaji asenoki shimtet nungbo Naga nunger asoshi aiatai ajurutsü. Saka shidakba Messiah ji sensaker dang meimba, ajak dang saku meimba, tila tulu mesadangba, Ochishir, Nüpur sen maoyaba saka Naga lima yanglutsü bilemba, Naga lima meimba takümji shimdi.
Hoi Naga nungertem, Naga lima yangluner asü raksaner? Election anogo tonga arudarji tanü nokdaka alirtem dak Naga lima yanglutsü teimla lia ngura parnok shimdiko, saka tanü amasa alima ashioktsüdi süra shir dak Naga lima yangertettsü teimla lir par shimdi arungma?