Nai ajizükang (Ibri 11:7-19)

“Kechiyong kechi koda nisung kati mangaba ajanga nisung aika temenen pur kümdaktsür, aji oda kati tashi angaba ajanga aika temeshi pur kümdaktsür” (Rom 5:19).
Tashi angaba aser mangaba agi asenok meketbanga lir, aser tashi mangaba küboki mela mela aier (Ef. 2:2). Tashi mangaba mangazüktsü asoshi lemang tajungtibaji tashi angaa shirnoki jajar parnok nungi angazüker (Kol. 3:6-8).
Tejaklen shirnok mepet tulu kübok jaja parnok nungi asenoki angazüktsü akok, Yisuji tematiba tatishitsü lir (Ibri 12:11). Pa bushitsü aser mita alitsü asoshi asenok aja (Ibri 3:1-2). Yisui tashi angabaji tetsüngdai aitba ka masü saka Pa dak aketba jakla. Pai tasü tonga tashi anga. Pa taküm tetenzük nung tatem tashi tashi angabaji pa jakla liasü. Pai Tebu dang Yordan ayong nung, tatitangba arem nung, Gethsemane Atsüki nung, Golgotha tenem nung aser ajaklen Pai tashi anga. Alima nung Pai tashi mangaba kecha nunga mangur. Khrista mulungsentsü nenok dak liang (Fil. 2:5,8). Asenoki teti tashi angadi (t.12).
Ibri 11 ji Tsüngremer Nüngtuku Ki ta ajar. Ibai Tsüngrem dang tashi angar noksa agi sünga lir. Noai Tsüngrem dang tashi anga (Ibri 11:7). Abrahami Tsüngrem dang tashi anga aser pa akaba ajak toktsü (t.8). Yosefi tepuatsü anema tashi anga (t.22). Mosai jangratemtsü ajak toktsür Tsüngrem dang tashi anga (t.24). Danieli amokmeren anema Tsüngrem dang tashi anga. Nütsüngtemi rishikangshi tiyalung nung Tsüngrem dang tashi anga.
Mezüngpur tashi angabaji Laishiba nung dang Arogo otsü ajunga nung angur. Amy Carmichaeli (1867-1951) Tsüngremer tajaba nung tashi anga aser Indiai aru. William Careyi (1761-1834) Tsüngremer tajaba angaa India i aru. David Livingstonei (1813-1872) tashi anga Africa limai ao. Adoniram Judson (1788-1850) tashi anga Burma limai ao. Hudson Taylor (1832-1905) tashi anga Chinai ao. Sadhu Sundersingh (1889-1929) Osangtajung bener India ajunga nung senzü kechiaser pa nükjitongji tashi angatsüba liasü. Tashi manga asübo Mary Slessor i(1848-1915) nisung shi achirtem rongnung mapa inyaktsü meshimtetla. Tsüngrem dang tashi anga Graham Staines i (1941-1999) pa taküm aser par chirtem taküm bendanga magütsüla. Tashi angaba agi tebutsü Gladys Staines, pa arongdak yutsü. Item mezüngpurtemi asenok ajungshidaktsüdi.
Oba, kü mulungjang Ne dang tashi angaba sünga alitsü Ne taochi kü nem kua. Amen.