Narendra Modi-i BRICS Summit nung adener

Xiamen, September 3 (Agencies): Deobar nikongdang Prime Minister Narendra Modi-i BRICS Summit nung adentsü atema Xiamen tongogo.
Anogo ananü China semdangdang Modi-i Russia Tir Vladimir Putin aser tanga BRICS lennirtem den ajurutepa sendentem amentsü sentong lir.
Paisa Egypt lennirtem dena ajuruteptsü. China-i outreach exercise ka ama Egypt, Kenya, Tajikistan, Mexico aser Thailand linüktem Summit nung guest countries ama adentsü jaoka liasü.
India aser China tsüngda anogo 73 tashi Dokalam nung tekong merangtepa aruba anenba sülen Modi-i Brazil-Russia-India-China- South Africa (BRICS) Summit nung adentsü atema China semdanger.
“BRICS-i küm 20 tashi terenlok aser yimjung atema mapa inyaka aruba nung India-i tongti shilem agia arur aser temulung agütsür. BRICS-i alima tayongzükbatem atema aser talisa yimjung aser security atema teinyaktsü aika lir” ta prime minister Modi-i ashi.
September 5 nü China tir Xi Jinping-i ayongba Emerging Markets and Developing Countries Dialogue nung Modi-i BRICS züngsemtem densema tanga linük 9 nungi lennirtem den ajurutepa sensaksemtsü kanga yongyar ta metetdaktsü.
“Onokisa linük pungu nungi industry len anirtem den BRICS Business Council nunga sensaksemtsü” ta Modi-isa shisem.
Hombarnü BRICS Summit agiba sülen Mongulbarnep Modi aser Xi na ajuruteptsü sentong lir.
Tanü Xiamen airport nung Chinese Assistant Foreign Minister, Kong Xuanyou aser Chinese envoy to India, Luo Zhaohui nati Prime Minister Modi pela agizük.
Xi den ajurutepa daka alia, Modi-isa Russia tir Vladimir Putin, Egypt aser Brazil tirtem den BRICS New Development Bank president K.V. Kamath nunger dena ajuruteptsü sentong lir.