NBCC-i election nung timi shilem agitsü ayongzüker

Dimapur, Tsüklai 9 (TYO): Nagaland nung state election agitsü atema mapang tonga arudang tesem kar nung ozüng alema mapa inyakba, sen o prangpong-injang amshiba aser nisungtem amokmerenba osangtem angashia tebilemtsü abener aser item maparen khukhua aitsür ta Nagaland Baptist Church Council (NBCC)-i metetdaktsü.
Election nung ozüng alema mapa inyaksangshiba anentsü aser democratic inyakyim nung aliba ama election nung shilem agitsü ayongzüker ta NBCC-isa ashi.
Ketdangsertem aser paramilitary force temi yi aser prangpongtem belenba inyakyim dena election nung ozüng alema mapa inyakbatem mitba atema tenüngsang agütsür aser maneni ozüng alema inyakbatem mita reprangtsü ayongzüker, ta NBCC-isa metetdaktsü.
NBCC nung züngsema aliba telok kari Clean Election Campaign yakyaka inyakba atema kanga pelar ta parnokisa ashi.