Ne Kolak Tejakrep – (1 Korint 12:14-27; 13:1-3)

“Iba lungma nung shiba tsükdir pa anüka raksatsü;saka shiba dak ibai tsükdir, iba jagi pa auyi küma menüngsatsü” (Mt. 21:44).
Lungji Yisu. Pa temetsüdaktsü lung ka liasü, aser lung nungji metsüdaker (Rom 9:33; Isa. 8:14). Yangi tangazüktsü lesson tulu agütsür: Tsüngrem anema kodanga teinyak!
Paul yimsü nung tejangra tulu aliba ngasangatem aser asüküm nisung ka liasü. Pa Kibubai atsüzük, aser tenük pokdaktsü aser ochiba sayutsü pa dang sayu: “Aso anema metsütsü pa asoshi tasak liasü” (T.Mapa 9:5). Paul Professor Gamaliel kübok tangazüker ka süaka, pai iba ochiba timi angatetta mali asü. Kechiaser Gamaliel asoshi iba ama Teratatsü tia nung pa leniba nükjidongji: “…Saka ibaji Tsüngrem nungi süra, nenoki parnok samadaktsütsü makoktsü, aser nenok Tsüngrem anema Rarartem ta nenoki angatettsü” (T.M. 5:34,38,39).
Tanü Tsüngremi alima ajunga nung sayutsüngitsü asoshi Khristan mapa tenzükba aika adokdaktsüogo. Kar kijai, kibong telungjem aser kar tentet ka kümer inyaker. Asen lima teraksa lima nung onok mapa tajungba, tanela nung inyaker ta tokteper! Asenoki iba tangatetba memelenshira asenoki ajak dak tai kenshia bushitsü. Asenok dak aliba anak dang nungi tangar dak aliba anakji tuluba angutsü! Khrista kangkii asenok dak mapa meinyakdaktsü tashi iba tangatetba memelenshitettsü. Pei dak aliba tashi mait mangatet tashi rongsen, mapang aser nübu indokba kisüng jagi Khristan tenzükba mapa nung takok mangutsü.
Khristan minister aser tenzükba mapa nung shinga tabensaba mali. Ajak dak tashi mait aser tashi lir. Asenoki tangar meraksadaktsüi yanglutsütsüla. Tsüngremji Lung ka lir! Ni iba nung metsüktsüla aser kü kolak mejakreptsüla. Adianu meimtepbaji Tsüngremer metsü- anungji asenok o nung aser mapa nung meimtepdi.
Kibuba Yisu, Nai onok dang meimba ama onok rongnung meimtepa Khristan tenzükba mapa tashi ita inyaktsü yariang. Amen.