Neiphiu Rio-i NDPP nung aden; CM candidate asütsü

Kohima, Aenjeti (January) 17 (TYO): NPF nung Central Office Bearers (COB)-i 2014 bangzüng nung masetshii amettsü telemtetba agiba sülen taoba Chief Minister aser Lok Sabha MP, Neiphiu Rio-i tanü Nationalist Democratic Progressive Party (NDPP) nung denogo.
April 2014 nung NPF lennirtem aser züngsemtemi memulungaka Rio-i Chief Minister menden toktsür Lok Sabha elections nung tokteptsü telemtetba agiba NPF-i agizük aser idangji parnokisa Member of Parliament teinyakdak nübo kümsük metembangdang state-i tanaben arua metokteptsü atema bangzüng ka renem.
Aenjeti (January) 15, 2018 nü Central office nung NPF indang COB senden amendang kasa bangzüng renemba nungi masetshitsü telemtetba agi.
Rio-i Lok Sabha züngsem ka ama ano küm ka inyaktsü mapang anünga lir.
NDPP President Chingwang Konyak-i tanü ashiba agi, pa den Working President Alemtemshi Jamir aser tanga lennirtemi Rio den Dimapur nung par kidang ajurutep aser NDPP nung adentsü mepishi.
Idangji Rio-i NDPP nung adentsü mulunga agizük aser NDPP lennirtemi pa jaokba atema pelaba metetdaktsü, ta Chingwang Konyak-isa ashi.
“Naga loktiliba nung temelenshi bener arutsü aser sorkar ketdangsübaren nung ochishia inyaktsü alizüng yur NDPP ya tentetba lir ta Rio den sensaksemdang pai agizük” ta NDPP President-isa shisem.
Naga loktiliba nung temelenshi, yimjung aser terenlok bener arutsü atema nübortemi NDPP den yariteptsü mepishir, ta paisa ayongzük.