Neiphiu Rio-i shisaliok rejutem nung yimyatsüya & wainshin sayutsü ayongzük

Dimapur, October 14 (TYO): Nagaland nungi Lok Sabha Member of Parliament, Neiphiu Rio-i asüng senso tajungtem adoktsü atema shisaluyimba nung tajungtiba akümtsü merangtsüla ta ayongzük.
Honibarnü Hebron Higher Secondary School, Sovima indang Silver Jubilee benjung nung o jembidang Rio-i shisaluyimba inyakyim nung tila asüdang nungi yimyatsüya aser wainshin tesayubatem agütsütsüla ta ashi.
“Shisaluyimba nung nursery aser primary jenjang ya kanga tongtipang lir. Nenoki parnok dang yimyatsüya aser wainshin sayutsüla. Japan, New Zealand, Scandinavia aser tanga advanced linüktem nung ‘shisaluyimba jakdang yimyatem mezüng südakjang’ ta tangatetba nung inyaksangshir” ta Lok Sabha MP-isa shisem.
“Nisung ka taküm nung mezüngbuba rejuji kibong lir. Kibong nung asenoki tanurtem dang shitak aser tai tesayubatem agütsür. Iba nung school-ia yarisema tanurtem nem tesayuba shitak agütsütsüla. Ibaji asü nungdang parnoki pei tsüraburtem danga shitak mesüra tai ashitsü akok” ta Rio-isa ashi.
Tsüraburtemi school uniform melentsü atema tebilemba lemsatepba atema Rio-i Japan nunger atishia jembidang, “Japan nungbo teburtemi army sübotsü mesüka aser tetsürtemi navy sübotsü mesüka uniform agir. Iba ama uniform agiba ajanga parnoki tebilemtsü ka abener” ta metetdaktsü.
“Tesüiba küm ishika ni Hebron Higher Secondary School repranga aser shisadanga arur aser kümshia iba school kanga renloka aoba ajiteter. Governing Body-i infrastructure talila yanglutsü aser tekazünütsü tesem ka kümdaktsütsü meranger. Talisa, tesayurtemi tebilemtsü bena inyakba atema tenüngsang agütsür saka ano nenoki maneni bendanga agüja inyaktsü ayongzüker” ta paisa shisem.
Rio-isa, Sovima Village Council dang yimtsüng lenmang ulushia yangluba atema tenüngsang agütsü. “Nisung aika iba yimtsüng nung alitsü atema arutsü aser kaketshirtema aika iba school nung azüngi arutsü” ta paisa shisem.
“Yangi alirtemi school ajungkettsüla aser tangartem pelashishia agizüktsüla. Sovima village temeket nung Tetseo College, Rincho Academy, St. Joseph’s University, Sovima Government High School, St. Joseph’s Higher Secondary School, Logos Theological College, Nagaland Cricket Stadium (Cricket Academy ka lapoktsü), Asian Institute of Higher Education and Research amala reju tajungtem lir aser asenoki iba tesem ya shisaliok rejutem indang centre ka kümdaktsütsü akok” ta paisa ashi.