Nepal menoknok nüngtem nung ashikülaker India nunger 3 apu

Kathmandu, July 07 (Agencies): Nepal nung menoknok lendong nungi kümzükbapurtem nem sen 200,000 teyari agütsütsü ta tiyazü nung nangzüka nüburtem dang sen saruba asoshi Mongolbar nü Nepal nung India nunger nisung asem puogo.
Bihar, Champaran tesem nungi Sujit Kumar, Sudip Kumar Kusuhawa aser Ranjit Kumar Kusuhawa nungeri India sorkar tenüng amer sen sarua liasü, aser police-i parnok anema ashikülakba ken o benokogo.
“April 25 aser May 12 nü Nepal nung menoknok lendong atalokba nungi kümzükbapurtem nem India sorkari sen 200,000 teyari agütsütsü asoshi ta ser form ka fill up asütsü atema parnoki sen sarua liasü,” ta Garuda Police Station Inspector, Santu Prasad Jaiswar-i ashi.
Osang kar angazüba sülen Nepal Police-i par asemji Fatuwa Harsaha VDC-6 nung lia apu. Item form fill-up asütsü atema parnoki sen 100 nungi 300 tashi sarua liasü.
Nisung ka tenüng agi Suraj Kumar Sah-i, “menoknok agi kongshibapurtem asoshi India sorkari sen 100,000 nungi 200,000 agütsütsü ta parnok dak amanga onoki form ji fill up süogo,” ta ashi.
Police-i parnok ket nungi form, laptop, rubber stamp, mobile phone, Income Tax Department of India indang card, India bank balala indang master card den visa card aser motorcycle ka puogo.
Aibelenertem jagi parnok tai nangzükogo, ta osang angazüker.
Nepal nung menoknok tesashi ana nungji nisung 9,000 jungnüa süogo aser kiojen teraksatsüba jendi liasü.

You must be logged in to post a comment Login